Холанд Мбаппенинг рекордини йўққа чиқарди

Чемпионлар лигасининг бешинчи турида “Манчестер Сити” ўз майдонида “Лейпциг” футболчиларини қабул қилиб, 3:2 ҳисобида иродали ғалабага эришди.

Учрашувда гол урган Эрлинг Холанд икки рекорд қайд этди.

ESPN нашрининг маълум қилишича, норвегиялик тўпурар Чемпионлар лигаси тарихида 40 та гол уриш учун энг кам ўйин сарфлаган футболчига айланди. Бу рекорд учун Холандга 35 та учрашув кифоя қилди.

Бундан ташқари, Эрлинг қитъанинг энг нуфузли турнирида 40 та гол урган энг ёш футболчи номига ҳам сазовор бўлди. У “Лейпциг” дарвозасини ишғол қилган пайтда 23 ёшу 130 кунлик эди. Аввалги рекорд ПСЖ ҳужумчиси Килиан Мбаппега тегишли бўлган.

Эрлинг Холанд жорий мавсумда барча турнирларда 20 та учрашув ўтказиб, ўз ҳисобига 19 та гол ва тўртта ассист расмийлаштирди.