Вадим Абрамов: "Биринчи бўлимни жуда ёмон бошладик"

Суперлиганинг 14-туридаги «Қўқон-1912» - «Динамо» (2:3) учрашувида меҳмонлар бир футболчи кам бўлиб қолишига қарамасдан иродали ғалабага эришди. "Динамо" матбуот хизмати ўйиндан кейин жамоа бош мураббийи Вадим Абрамовнинг матбуот анжуманида журналистлар саволларига қандай жавоб қайтарганини баён қилди.

- Вадим Карленович, аввало ўйин ҳақида гапирсангиз...

- Нима дейиш мумкин, қийин учрашувни ўтказдик. Айниқса, биринчи бўлимни жуда ёмон бошладик ва гол ўтказдик. Кейинчалик омадимиз келиб, иккита гол уриб олдик. Ҳаммаси яхши бўлиб турган пайтда эса рефери ўйинга аралашди ва билмадим, қанақасига бу вазиятда сўнгги умид фоли сифатида қизил карточка берганини тушунмадим. Ўша нуқтадан гол ҳам уриб бўлмасди, ахир. Қўшимчасига ўша вазиятда тўп рақиблардан майдон ташқарисига чиқиб кетган ва биз аутдан тўпни ўйинга киритишимиз керак эди. ВАР ҳакамни ўзига чиқарди, лекин тўп қаерга кетганини кўришмади ҳам. Энди муаммомиз янада катталашди – уч футболчимиз сафдан чиқди. Олдинда эса бизни «Нефтчи» ва «Насаф»га қарши ўйинлар кутиб турибди. 

- Суперлигада селекционерлар яхши ишламаётгандек. Сизни эса яхши селекционер деб биламиз. Ҳозирги аксарият селекционерларнинг шунчаки номи бор, лекин тайинли иш қилмаётгандек...

- Фикримча, бу катта муаммо эмас. Селекция ишларини олдин футбол ўйнаган собиқ футболчилар олиб боргани яхшироқ. Бунинг учун ҳам иқтидор керак. Бу ҳолатни гапириш мен учун қийин. Яхши собиқ футболчини топсангиз, у жамоага бемалол ёрдам бера олади. Ишлаш керак.

- «Динамо» чемпионлик учун кураша оладими? Жамоанинг бунга кучи етадими?

- Бу ҳақда гапириш ва тахмин қилишга эрта. Келажак ҳақида гапириб бўлмайди. Айтганимдек, бугун асосий таркибнинг уч футболчиси сафдан чиқди. Бизни олдинда биринчи давранинг сўнгги икки ўйини кутиб турибди. Бундай иссиқ ҳавода барчага ҳам осон эмас. Шу сабабли чемпионлик учун кураш ҳақида сентябрь - октябрь ойида гаплашиш мумкин. Олдимиздаги икки ўйинда ва бу баҳсларда бор кучимиз билан ўйнашимиз керак. Агарда барчаси яхши бўлса, нимадир дейиш мумкин бўлади. Ҳаммаси натижаларга боғлиқ.