Холанддан воз кечишди

“Манчестер Сити” ҳужумчиси Эрлинг Холанд “Барселона”га трансфер қилинмайди. Barca Universal маълумотига кўра, Жоан Лапорта Каталония клуби президенти лавозимига қайта сайланганидан сўнг норвегиялик ҳужумчини сотиб олишни тўлиқ рад этди.

Холандни харид қилиш ваъдаси Лапорта учун президентлик сайловида “Б режа” вариантини ўтаган, агар у президентлик сайловида ортда қолган тақдирда, Холандни олиб келишни ваъда қилиш орқали овозлар сонининг ошишига таъсир ўтказмоқчи бўлган.

Жоан Лапорта бундай трансфер молиявий жиҳатдан “Барселона” иқтисодиётини издан чиқаришини яхши тушунади ва клубнинг ҳозирги муваффақиятларини ҳисобга олганда, бу трансферга эҳтиёж йўқ.

Эрлинг Холанднинг “Манчестер Сити” билан амалдаги шартномаси 2034 йилнинг 30 июнигача тузилган. Қимматбаҳо ўйинчига “Барселона”нинг ашаддий рақиби “Реал” ҳам даъвогарлик қилмоқда.