Ян Зоммер: "Бахтимизга у гол урмади"

Миланинг “Интер” клуби дарвозабони Ян Зоммер УЕФА Чемпионлар Лигаси ярим финал жавоб ўйини доирасида “Барселона”га қарши ўйиндан сўнг ўз фикрларини билдирди. Учрашув 4:3 ҳисобида италияликлар фойдасига якунланди. Иккала ўйиннинг умумий натижасига кўра, ҳисоб 7:6 бўлиб, “Интер” финалга йўл олди.

— Мен жуда бахтиёрман, биз ажойиб ўйин ўтказдик. Энг эсда қолган зарба? Ламин Ямалнинг охирги зарбаси — у ажойиб футболчи, бахтимизга, у гол ура олмади. Кўплаб жамоалар 2:3 ҳисобидан кейин таслим бўларди, лекин биз ундай қилмадик. Ва ирода билан ғалабага эришдик, — дея Зоммернинг сўзларини УЕФАнинг расмий сайти келтирмоқда.

“Интер” Чемпионлар Лигаси финалида ПСЖ — “Арсенал” жуфтлиги ғолибига қарши майдонга тушади. Ушбу жуфтликнинг биринчи ўйини парижликларнинг 1:0 ҳисобидаги ғалабаси билан якунланган эди. Жавоб ўйини бугун, 7 май куни бўлиб ўтади.