"Сити" ёзда "Барса" юлдузини сотиб олишдан бош тортгани маълум бўлди

«Манчестер Сити» ўтган ёзда «Барселона» ярим ҳимоячиси Френки де Йонгни ўз сафига қўшиб олиш имкониятини кўриб чиққан, аммо кейинчалик бу ғоядан воз кечган.

The Touchline нашри ёзганига кўра, инглиз клуби раҳбарияти «Барселона» вакиллари билан алоқага чиққан. Потенциал трансфердан олдин «Манчестер Сити» де Йонгнинг тиззасидаги жароҳати бўйича тиббий ҳужжатлар билан танишишни сўраган. 

Ҳужжатлар ўрганилгандан сўнг, манчестерликлар футболчини олиш бўйича музокараларни давом эттирмасликка қарор қилган.

Френки де Йонг 2019 йилдан бери каталонияликлар шарафини ҳимоя қилиб келмоқда. Шу вақтгача у клуб таркибида 297 ўйин ўтказиб, 20 та гол урган ва 31 марта голли узатма берган. Унинг «Барселона» билан амалдаги шартномаси 2029 йилгача мўлжалланган.