O‘zbekiston - eng yuqori saviyadagi terma jamoa!
Latviyaning Riga shahrida boks bo‘yicha "Riga Open - 2016" xalqaro turnirida dunyoning o‘ndan ziyod mamlakatidan 150 nafarga yaqin bokschi g‘oliblik uchun kurashmoqda. Ushbu musobaqa Evropada uzoq yillardan buyon davom etib kelayotgan turnirdir. Bu gal 67-marotaba o‘tkazilmoqda.
Musobaqada Sirojiddin G‘ulomjonov, Abdulhay Shorahmatov, Elnur Abduraimov, Mahmud G‘oipov, Bahodir Jalolov mamlakatimiz sharafini himoya qilayotir.
Musobaqa tashkilotchisi - Latviya boks federatsiyasi prezidenti Nil Juravlyov O‘zbekiston terma jamoasini ushbu nufuzli turnirning ko‘rki deb atadi.
- Turnir qatnashchilarining barchasi kuchli tarkibga ega, - dedi Nil Juravlyov. - Lekin O‘zbekiston eng yuqori saviyali jamoa. Rio Olimpiadasida o‘zbeklar ettita medal jamg‘ardi. Uch bokschi chempion bo‘ldi. Ular Rioda eng zo‘r ekanliklarini isbotlashdi. O‘zbekistonlik charm qo‘lqop ustalarining "Riga Open - 2016"da qatnashishi turnirimizning nufuzini yanada ko‘taradi.
Darhaqiqat, O‘zbekiston terma jamoasi a’zolaridan Sirojiddin G‘ulomjonov, Elnur Abduraimov va Mahmud G‘oipov dastlabki janglarinida zafar quchdi.
Izohlar (0)