Diomande "Real" tarixidagi eng qimmat transfer bo‘ldi
Madridliklar ilgari bunaqa qimmat oʻyinchi olmagan
Germaniyaning «RB Leyptsig» klubi hujumchisi Yan Diomandening Madridning «Real» jamoasiga o‘tishi ispan grandi tarixidagi eng qimmat transfer sifatida qayd etildi. Ommaviy axborot vositalari xabarlariga ko‘ra, «qirollik klubi» Kot-d’Ivuar terma jamoasi a’zosi uchun 140 million yevro to‘lagan, shundan 15 million yevrosi turli bonuslardan iborat.
Shu tariqa Diomande «Real» uchun transfer narxi bo‘yicha qator yulduzlarni ortda qoldirdi. Ungacha klub tarixida eng qimmat xarid sifatida «Manchester Yunayted»dan 94 million yevro evaziga olib kelingan Krishtianu Ronaldu qayd etilgan edi. Keyinchalik bu rekord «Tottenxem»dan 101 million yevroga olingan Garet Beyl, «Chelsi»dan 120 million yevroga kelgan Eden Azar va «Borussiya» Dortmund safidan 134 million yevro evaziga qo‘shilgan Jud Bellingem tomonidan yangilangan edi. Endi esa bu ro‘yxatning yuqori pog‘onasiga Yan Diomande chiqdi.
Diomande 2025 yildan beri «Leyptsig» sharafini himoya qilib kelardi. 2025/2026 yildgi mavsumda u jamoa tarkibida 36 o‘yinda maydonga tushib, 13 ta gol urdi va 10 ta golli uzatma muallifiga aylandi. Internet-portal Transfermarkt ma’lumotlariga ko‘ra, futbolchining taxminiy bozor qiymati 90 million yevro atrofida baholangan. Yaqinda o‘tkazilgan jahon chempionatida Kot-d’Ivuar terma jamoasi safida to‘rtta uchrashuvda maydonga tushgan Diomande bir bor golli pas bilan jamoasiga yordam berdi.

Izohlar (0)