Shomurodovdan "yaxshi ko‘radigan" darvozabon jamoadan ketdi

Italiyaning “Salernitana” jamoasi yakunlangan mavsumda A Seriyadagi o‘rnini saqlab qola olmadi va quyi ligaga tushib ketdi.

Endi jamoa tarkibida jiddiy o‘zgarishlar bo‘ladi. “Salernitana” darvozasini so‘nggi ikki mavsumda qo‘riqlagan mashhur darvozabon Gilermo Ochoa erkin agent sifatida salernoliklar safini tark etdi. Shuningdek, Germaniya terma jamoasining sobiq futbolchisi Jerom Boateng ham boshqa jamoa qidiradigan bo‘ldi.

Qizig‘i shundaki, A Seriyada faoliyat ko‘rsatayotgan Eldor Shomurodov Gilermo Ochoa uchun eng noqulay raqiblardan biri hisoblanadi.

Legionerimiz o‘tgan yili “Spetsiya” tarkibidagi yagona golini aynan “Salernitana”ga urgan edi. Bu mavsum esa, Shomurodov “Kalyari” hujumchisi sifatida Ochoani o‘z darvozasidan ikki marta to‘p olib chiqishga majbur qildi.