“Барса”да ўйнаган футболчи Файзуллаевни қанчага трансфер қилиш кераклигини айтди
Игорь Корнеев ЦСКАдаги муваффақиятли фаолиятидан кейин Европага йўл олган Россиядаги дастлабки футболчилардан бири. Моҳир ярим ҳимоячи легионер сифатида Испанияда “Эспаньол” ва “Барселона”, Нидерландияда “Херенвен”, “Фееноорд” ва “НАК Бреда” клубларида тўп тепган.
Корнеев “Спорт Экспресс” нашрига берган интервьюсида ЦСКА ва унинг ўйинчилари ҳақида ҳам фикр билдирди.
— ЦСКАнинг энг нозик нуқтаси қайси?
— Ўнг ва чап қанот ҳимоячилари.
— Кейинги пайтда чап қанот ҳимоясида Илья Агапов ўйнаяпти. Ёзда бу позицияда ўйнаш учун ЦСКАга келадиган Данил Круговой рақобатда уни енга оладими?
— Круговой бу амплуа учун биринчи рақамли ўйинчи бўлади. Бунинг учун ЦСКА келаси мавсумда ҳам ҳозирги схемада ўйнаши керак.
— Ўнг қанот ҳимоячиси сифатида Келлвенга қандай баҳо берасиз?
— Ҳозирча ишончни оқлагани йўқ. Катта ҳажмдаги ишларни бажаряпти, лекин унга сифат етишмаяпти.
— ЦСКА шартномани узайтиришдан бош тортаётган Виллиан Рошани сақлаб қола оладими?
— Ўйлашимча, йўқ. Бразилиялик легионер анчадан бери Европани кўзлаяпти.
— Фёдор Чаловнинг бу мавсумдаги ўйинини қандай баҳолайсиз?
— Шартномани узайтириш бўйича қийин даврларни бошдан кечирганини инобатга олиб, мустаҳкам тўрт баҳога баҳолайман.
— У Европага кетадими? Қайси чемпионатга? Масалан, Испанияни олсак, қайси даражадаги клубга ўтиши мумкин?
— Фёдор анчадан бери кетишни истайди, айни пайтда россиялик футболчилар ўйнаётган ҳар қандай чемпионат бўлиши мумкин.
— Файзуллаев — бу мавсумнинг энг яхши трансфери бўлдими?
— Унга сарфланган маблағ ва ўйинчининг сифати бўйича энг яхшиларидан бири бўлди.
— Ҳозирча унга нима етишмаяпти?
— Ўйин дақиқалари.
— ЦСКА уни Европага қанча суммага трансфер қилади?
— Ўйлашимча, “армиячилар” яқинлашиб келаётган мавсумда Аббосбек бўйича таклифларни кўриб чиқмайди, лекин трансфер суммаси 5 миллион евродан кам бўлмаслиги аниқ.
Фикрлар