“Аustralian open-2017”: 36 миллионлик турнирда Денис Истомин чемпионга қарши кортга чиқишга тайёр
Мельбурн шаҳри мезбонлик қилаётган Австралия очиқ чемпионатида эртага иккинчи давра беллашувлари якунланади. Мукофот жамғармаси 36 миллион ошиқ бўлган "Катта дубулға" мусобақасининг иккинчи даврасида ҳамюртимиз Денис Истомин Австралия очиқ чемпионатининг амалдаги ғолиби сербиялик Новак Жоковичга қарши ўйин ўтказади.
Албатта, турнирда иккинчи рақамда сараланган Новакнинг ўзбекистонлик теннисчига қарши бўладиган ўйини кўпчилик мухлису мутахассисларни қизиқтиради. Чунки Денис Истомин юқори нуфузли мусобақаларда кучли ўйин кўрсатиши билан ном қозонган. Буни илгари интервьюларидан бирида Новак Жокович ҳам эътироф этган.
Қолаверса, ҳар икки теннисчи бир бирини яхши билади. Шу кунгача Денис Истомин ва Новак Жокович Австралия очиқ чемпионатида 2010 ва 2014 йилларда ўзаро тўқнаш келган. Австралиядан ташқари АҚШ, Канада ва Бирлашган Араб Амирликларидаги турнирларда ҳам сербиялик теннисчи ҳамюртимизни мағлуб этишни уддалаган.
Бу йилги Австралия очиқ чемпионатининг дастлабки босқичида Денис хорватиялик Иван Додигни, Новак Жокович эса испаниялик Фернандо Вердаскони мусобақадан чиқариб юборди.
Фикрлар