Максим Шацких: "Агар у жамоамизга мос келмаганида бу ерда бўлмасди"

Чемпион – “Пахтакор” ҳам “Мавсум-2023” учун тайёргарлигини давом эттиряпти. Бош мураббий Максим Шацких олдида янада масъулиятли вазифалар турибди. Чунки у ўз жамоаси билан Осиё Чемпионлар лигасида қатнашади. Бу ёқда мамлакат чемпионлиги ҳамда Кубоги учун курашлар бор.

Анталияда Шацких билан кўришдик. Ўшанда ҳам йиғин ҳақида фикрлари билан қизиқмоқчи бўлгандик. Бироқ Максим Александрович Туркиядан қайтгач, рози бўлишини айтганди. Шундан фойдаланиб, бу сафар яна мурожаат қилганимизда ўз фикрларини билдирди.

- Максим Александрович, “Пахтакор”нинг янги мавсумга тайёргарлигидан қониқяпсизми? Айтинг-чи, жамоангиз чемпионатга неча фоизга тайёр?

- Ҳа, режалаштирилган ҳамма ишларни амалга оширганимиздан кўнглимиз тўлди. Бахтимизга об-ҳаво ҳам, спарринг-рақиблар ҳам яхши бўлди. Ўз даражамизни бошқаларники билан таққослаб олиш – бу жуда муҳим. Тайёргарликни 80 фоизга баҳолайман. Чемпионат бошланишига 100 фоизга тайёрмиз, дея олмайман.

- Селекция жараёнида ўзингиз истаган барча футболчиларни қўлга кирита олдингизми ёки кимдир қолиб кетдими?

- Кимни жалб этишни режалаштирган бўлсак, барчасини олдик!

- Сардор Рашидовни таклиф қилиш ташаббуси сиздан чиқдими? У ўйин услубингизга тўла мос келадими?

- Ҳа, Сардор Рашидовни мен таклиф қилдим. Агар у жамоамизга мос келмаганида, бу ерда бўлмасди!

- 25 февраль куни “Пахтакор” Қозоғистоннинг “Қайрат” жамоасига қарши ўртоқлик учрашувида ўйнайди. Бу ўйин жамоангиз учун қанчалик муҳим?

- Бу халқаро даражадаги баҳс. Албатта, муҳим бўлади-да! Боз устига чемпионат старти арафасида мана шундай яхши рақиб билан куч синашишга нима етсин. Бундан ташқари, ўзаро рақобатимизнинг тарихи жуда узун.

- “Пахтакор” Ўзбекистоннинг амалдаги чемпиони. Чемпион бўлиш қийинми ёки чемпионлик камарини ҳимоя қилишми?

- “Пахтакор” мамлакатнинг 15 карра чемпиони. Омад келса, ҳар қандай жамоа бир марта бўлса ҳам чемпион бўлиши мумкин. Аммо чемпионликни ҳар йили исботлаш – бу жуда ҳам машаққатли иш. Лекин биз бунга интиламиз.

- Барча клублар янги футболчиларни трансфер қилди. Сиз учун 3 та топ трансфер қайсилар?

- Бизда ҳамма трансферлар топ.

- Анталияда бир неча бор “Насаф” иштирокидаги ўйинни кузатганингизга гувоҳ бўлдик. Бу “Пахтакор”нинг асосий рақибларидан бири. Осиё Чемпионлар лигасида мағлубиятга учради. Буни кутганмидингиз ёки...

- Биз учун ҳар қандай рақиб рақобатчи. “Насаф”га оғир бўлишини билгандим. Аммо унинг кейинги босқичга йўл олишидан умид қилгандим, бироқ...

Шуҳратбек Жўраев.