Вакант камар, икки даъвогар ва ягона имконят!

Енгил вазн чемпионлиги учун жанг яқинлашмоқда.

Амалдаги чемпион Ислом Махачев юқори вазнга кўтарилгач вакант қолган камар учун Илия Топурия ва собиқ чемпион Чарльз Оливейра куч синашади. Бу беллашув ҳар икки жангчи учун ҳам ниҳоятда муҳим.

Ярим енгил вазн чемпионлигидан воз кечган Топурия учун бу — енгил вазндаги илк жанг ва у ўз карьерасидаги энг оғир синовга дуч келиши табиий. Оливейра эса чемпионлик камарини бой бергач, яна уни қайтариб олиш ва мухлислари олдида ўзини исботлаш имкониятига эга бўлади. Шунингдек, бу тўқнашув UFC енгил вазн тоифасида ким етакчи эканини ҳам кўрсатади.

Жангчилар бунга қадар турлича йўл босиб келишди. Мағлубиятсиз Илия Топурия 16 жангнинг барчасида ғалаба қозонган. "UFC 308" турнирида Макс Холлоуэйни техник нокаутга учратган грузиялик, ундан аввал Александр Волкановскини ҳам соф нокаут билан мағлуб этган эди. Сўнгги тўлиқ давом этган жангини эса 2023 йилда Жош Эмметга қарши ўтказиб, ҳакамларнинг якдил қарорига кўра ғалаба қозонган. У аслида енгил вазнга Махачев билан курашиш мақсадида кўтарилганди, бироқ доғистонлик спортчи вазн ўзгартиргач, бу беллашув амалга ошмади.

Чарльз Оливейра эса сўнгги бор америкалик Майкл Чендлер устидан якдил қарор билан зафар қучди. Бундан аввал Арман Царукянгача мағлуб бўлган, лекин Маҳачевга ютқазганидан кейин Бенеил Дариушни нокаутга учратиб, яна юқорига кўтарилган эди.

Хулоса қилиб айтганда, бири мағлубият нималигини билмаган ҳолда, иккинчиси эса ғалаба ва мағлубиятни бирдек бошидан кечириб, чемпионлик сари етиб келди. 

Ушбу баҳс UFC тарихида қолиши аниқ!

Улуғбек Хошимов тайёрлади