Тезкор: Файзуллаев ЦСКАдан кетди, кейинги манзил аниқ
Ўзбекистон миллий терма жамоаси ҳужумкор футболчиси Аббосбек Файзуллаев ҳам фаолиятини Туркия Суперлигасида давом эттиришга розилик берди.
Бир неча нуфузли манбаларнинг маълум қилишича, 21 ёшли ўзбек легионери ЦСКАнинг машғулотлар базасини тарк этиб, янги жамоаси “Истанбул Башакшеҳир”да тиббий кўрикдан ўтиш учун Туркияга отлаган.
- Файзуллаев Истанбулга йўл олди. Аббосбек ЦСКА билан Премьер-лиганинг биринчи туридан ўрин олган “Оренбург” жамоасига қарши учрашувга боргани йўқ. У “Башакшеҳир”да тиббий кўрикдан ўтиш учун Туркияга бориши керак, - деб маълумот берди таниқли инсайдер Иван Карпов ўзининг ижтимоий тармоқдаги саҳифаси орқали.
Яна бир манба – sport-express.net сайти ҳам Файзуллаев трансферига оид муҳим маълумотларни мухлислар эътиборига ҳавола қилди.
- Файзуллаев “Истанбул Башакшеҳир”га ўтмоқда. Клублар ўртасидаги келишувга кўра, трансфер учун 7,5 миллион евро тўланади.
ЦСКА 21 ёшли ўйинчи трансфери учун турк клубидан бадал пулини битта тўловда қабул қилади. Шу боис, Файзуллаев “армиячилар” билан “Оренбург”га қарши бўладиган учрашувга бормаган.
Аббосбек Файзуллаев ЦСКА таркибида Россия Премьер-лигаси бронза медали совриндори, мамлакат кубоги ва Суперкубоги соҳибига айланган эди, - деб ёзди sport-express.net сайти.
“Пахтакор” тарбияланувчиси бўлган 21 ёшли ҳужумкор футболчи 2023 йилнинг августида ЦСКА клубига кўчиб ўтган эди. Бу трансфер тошкентликлар 500 минг евро келтирган.
Қисқа фурсатда легионер сифатида ўзини кўрсата олган Аббосбек Файзуллаев хориж клублари эътиборини торта бошлади.
Аббос “армиячилар” таркибида барча турнирларда 72 маротаба майдонга тушиб, рақиблар дарвозасини саккиз марта ишғол қилди ва жамоадошларига 22 та голли пас узатди.
Туркия Суперлигасида юқори ўринлар учун курашишни мақсад қилган “Истанбул Башакшеҳир” ёзда таркибини жиддий тарзда кучайтиришга қарор қилган. Истанбулликлар яқинда “Рома”дан Ўзбекистон миллий терма жамоаси сардори ва энг зўр тўпурари Элдор Шомуродовни трансфер қилган эди.
Энди Файзуллаевнинг “Истанбул Башакшеҳир”га трансфери амалга ошиб, бу маълумот расман тасдиқланса, терма жамоамизнинг икки етакчиси бир клуб шарафини ҳимоя қила бошлайди. Айрим экспертлар бу ҳолат 2026 йилнинг ёзида АҚШ, Мексика ва Канада майдонларида ўтказиладиган жаҳон чемпионатида Ўзбекистон миллий терма жамоаси фойдасига ишлашини таъкидламоқда.
Қолаверса, “Истанбул Башакшеҳир” дунё бўйлаб бир неча клублар, хусусан, Абдуқодир Ҳусанов ўйнаётган “Манчестер Сити”га эгалик қилувчи Football City Group холдинги билан яқин ҳамкорлик қилади. Бу эса, Аббосбек Файзуллаевнинг Европа топ-лигаларидаги клубларга ўтиши учун йўл очиши мумкинлиги таъкидланди.
Фикрлар