“Реал” футболчи сўраб “Ливерпуль”га мурожаат қилди

“Реал” раҳбарияти ёзнинг бошида “Ливерпуль” ҳимоячиси Трент Александер-Арнольдни эркин агент сифатида жамоага қўшиб олгани мерсисайдликларга катта зарба бўлди.

“Қироллик клуби” бу билан чекланиб қолмоқчи жэмас. Нуфузли манбалардан ҳисобланган L’Équipe нашрининг ёзишича, мадридликлар яна бир трансфер борасида “Ливерпуль”га мурожаат қилган.

Манбага кўра, испанияликлар Англия чемпионларидан яна бир ҳимоячи Иброҳим Конатени шу ёзда трансфер қилиш учун керакли маълумотларни сўради.

Бироқ “Ливерпуль” 2021 йилдан бери ўйнаб келаётган 26 ёшли франциялик футболчини қўйиб юбормоқчи эмас. Клуб келаси ёз шартномаси тугайдиган ўйинчини олиб қолиш учун қўлидан келган барча чораларни кўришни мақсад қилган.

Бу масалада кўп нарса Конатенинг истагига боғлиқ бўлади. Агар “Ливерпуль” унинг талабларини бажариш йўлини топа олмаса, Иброҳим келаси ёз эркин агент мақомида исталган клубни танлаши мумкин.