Диогу Жота "Вулверхэмптон" шараф залидан ўрин олди

"Англиянинг "Вулверхэмптон" клуби Диогу Жотани клубнинг шараф залидан жой олган футболчилар рўйхатига расман киритди. Бу қарор футболчининг жамоадаги ажойиб фаолияти ва унинг ҳаётдан кўз юмгани футбол дунёсига салмоқли таъсир қилганини инобатга олган ҳолда қабул қилинди" — дея маълум қилди клуб матбуот хизмати.

Клуб раҳбарияти таъкидлашича, одатда шараф залига номзодлар юзасидан ҳафталаб муҳокамалар олиб борилади, аммо бу гал қарор якдиллик билан ва дарҳол қабул қилинди.

"Бу жуда таъсирли ҳаракат бўлди ва клуб бу қарорни тўлиқ қўллаб-қувватлайди. Диогу нафақат ёрқин футболчи, балки самимий ва камтар инсон эди. У "Вулвс" сафида бўлган давр мобайнида фидокорлик ва инсонпарварлик намуналарини кўрсатди. Унинг йўқлиги барчамиз учун оғир бўлади. У қолдирган мерос клуб тарихидан мустаҳкам ўрин эгаллайди" — деди "Вулверхэмптон"нинг футбол операциялари ва маъмурият бўйича директори Мэтт Уайлд.

Эслатиб ўтамиз, "Вулверхэмптон" шараф зали 2008 йили ташкил этилган бўлиб, унда ҳозиргача 38 нафар футболчи жой олган.

Диогу Жота ушбу жамоа сафида 2017 йилдан 2020 йилгача тўп сурган.