Ямалнинг отаси ўғлининг туғилган кун зиёфатида ҳеч қандай муаммо кўрмаяпти

"Барселона" футболчиси Ламин Ямалнинг туғилган куни муносабати билан уюштирган зиёфати атрофида юзага келган баҳсларга футболчининг отаси Мунир Насрауи жавоб берди.

Бироқ, зиёфатдан кейин Ахондроплазия ва шунга ўхшаш скелет-дисплазиядан азият чекувчи шахслар уюшмаси баёнот бериб, тадбирда қисқа бўйли одамлар фақатгина кўнгилочар восита сифатида жалб қилинганини билдирди. Бу ҳолат ижтимоий ҳуқуқлар вазирлиги томонидан текшириш учун назоратга олинди.

Футболчининг отаси Мунир Насрауи эса вазиятга муносабат билдириб, шундай деди:

"Биз бундай ҳаётда боламиз билан фахрланишимиз керак. У ҳақида ёмон гаплар айтганлар эса ўзларига қарасин. Агар у нотўғри иш қилганида, авваламбор мен, унинг отаси сифатида, унинг қулоғидан ушлаб: "Бундай қилма, ўғлим", дердим. Аммо у ҳеч қандай ёмон иш қилгани йўқ. Агар кимгадир шубҳа туғилса, полицияга мурожаат қилишсин. Аммо у ҳеч нарса қилмади, шундай экан, ҳаммаси жойида. Худо ҳаммани асрасин ва келинг, бир-биримизга ростгўй бўлайлик. Рахмат сизларга", – деди у "Europa Press" нашрига.

Эслатиб ўтамиз, яқинда 18 ёшга тўлган Ямал ушбу сана муносабати билан кенг кўламли кеча уюштирди. Унда машҳур стримерлар, инфлюэнсерлар, жамоадошлари ва мусиқачилар иштирок этди.