O‘zbek bokschilari jahon chempionatida g‘alaba qozonmoqda
Rossiyaning Sankt-Peterburg shahri mezbonlik qilayotgan boks bo‘yicha yoshlar o‘rtasidagi jahon chempionati O‘zbekiston terma jamoasi a’zolari uchun omadli boshlandi.
AIBA tarixida yigirmanchi marotaba o‘tkazilayotgan mazkur musobaqada dunyoning eng iqtidorli 350 nafardan ziyod bokschilari g‘oliblik uchun ringga chiqadi.
Jahon chempionatida yurtimiz sharafini himoya qilayotgan bokschilarimizdan Behruz Rahmonov 64 kilogramm vazn toifasida ozarbayjonlik Baxtiyor Gaziboevni 5:0 hisobida mag‘lubiyatga uchratdi. 69 kilogramm vazn toifasidagi janglarda qatnashayotgan Ulug‘bek Sobirov yaponiyalik Jen Kuronoyagini, 75 kilogramm vazn toifasida Shohruzbek Rustamov bolgariyalik Egor Skamaroxovni, og‘irligi 81 kilogramm bokschilar orasida Sanjar Tursunov litvalik Vilandas Vilkiukasni huddi shu hisobda engdi.
52 kilogramm vazn toifasida dastlabki jangini qirg‘izistonlik Fathiddin Hamroevga qarshi o‘tkazgan hamyurtimiz Otabek Xolmatov bellashuvni 4:1 hisobidagi g‘alaba bilan yakunladi.
Fikrlar