100 миллион евролик юлдузни оламиз

“Шпорлар” трансфер нишонлари рўйхатига “Брайтон” ярим ҳимоячиси Карлос Балебани ҳам киритди. Бу ўйинчини олиш учун лондонликлар “Манчестер Юнайтед” билан рақобатлашишига тўғри келади.  

Англия Премьер-лигасидаги юқори ўринлар учун курашишни мақсад қилган Лондоннинг “Тоттенхэм” жамоаси ҳам мунтазам таркибини кучайтириб боришга ҳаракат қилмоқда.

Caught Offside хабар беришича, 21 ёшли футболчининг жорий мавсум бошида ўйини пасайганига қарамай, “Брайтон” унинг потенциал трансфер нархини 100 миллион евродан туширгани йўқ.

Трансфер бўйича экспертларнинг таъкидлашича, бу сумма “Тоттенхэм”га оғирлик қилиши мумкин ва шу боис, “шпорлар” пухта ўйланган трансфер сиёсатини юритиши талаб этилади.

Жорий мавсумда камерунлик ярим ҳимоячи барча турнирларда 15 та ўйинда иштирок этган, аммо самарали ҳаракатларни амалга оширгани йўқ.

Футболчининг клуб билан меҳнат шартномаси 2028 йил ёзигача мўлжалланган. Transfermarkt порталидаги маълумотларга кўра, футболчининг бозор қиймати 60 миллион еврога баҳоланган.