80 миллион евродан 35 миллион еврогача ёҳуд бўлажак Мессими ёки Кркич?

"Transfermarkt" портали Ла Лиганинг нархи пасайган футболчиларини эълон қилди. У ерда биринчи ўринни Ансу Фати эгаллади. Вингернинг янгиланган нархи 35 миллион еврога баҳоланди. 

Ансу "Барселона"да Мессининг давомчиси сифатида қаралар эди. Аммо кўплаб жароҳатлар унинг даражасини пасайишига асосий омиллардан бири бўлди. Испаннинг 2020 йилдаги трансфер нархи 80 миллион евро ҳисобланган. Аммо бу футболчининг сўнгги муваффақиятларидан бири бўлиб қолмоқда. "Барса"нинг Чемпионлар лигасининг энг ёш дебютанти, клуб тарихида энг ёш гол урган футболчи каби бир қанча рекордлар соҳибини ушбу натижаларини қариган пайтида невараларига мақтаниб ўтиришдек ёмон келажак кутиб турган бўлиши мумкин. Албатта, бундай статистика ҳаммада ҳам йўқ. Аммо "Барса"да фаолиятини бошида рекорд ўрнатиб, кейинчалик умуман таниқсиз клубларда ўйнаб юрган футболчилар бор. Оддий мисол - Бохан Киркич. У каталонияликларнинг лигада энг ёш гол урган ва ЧЛда энг ёш майдонга тушган футболчисига айланган эди. Эбтибор қилса, собиқ Мессининг жамоадоши фаолиятини Фати билан деярли бир хил кўринишда бошлаган. Киркич 32 ёшида бутсаларини михга илди. Сўнгги бор "Виссел Кобе" учун ўйнади. Фатини ҳам мана шу инсоннинг тақдири кутиб тургандек, гўё.

Бир вақтлар катта марраларни забт этиши кутилган ва 10-рақам топширилган Ансунинг бугунги кунда жамоадаги ҳолатига ҳавас қилиб бўлмайди. У клуб таркибида 38 та ўйинда майдонга тушди. Бу кўрсаткичнинг бошқачароқ варианти ҳам бор. Фати ушбу мавсум майдонда 1341 дақиқа кўриниш берган. Таққослаш учун, Рафиньяда бу статистика 2130 дақиқани ташкил қилади. Маълумот учун, қаҳрамонимиз ҳали жароҳатдан азият чеккани йўқ. У мавсумни деярли сафдан чиқмаган ҳолда ўтказмоқда. Яъни Фатининг кам матч ўтказишига баҳоналар топилмаяпти. Демак, Хави унга ишонмай қўйган ва ёзда кетишига қаршилик килмайди, деган фикр ҳаёлдан ўтиши мумкин. Балки ростан ҳам шундай бўлар. Аввалроқ, Лапорта битта вингер сотишилиши мумкинлигини инкор қилмаган эди. Испания нашрлари эса ушбу трансфер Фати ёки Торрес бўлишини таҳмин қилмоқда. Бу бошқа мавзу. Ансу ёки Феррандан қайси бири клубни тарк этиши керак ва қайси бири кетишга яқинроқ эканлигини 37-турдан кейин муҳокама қилиш мақсадга мувоффиқ бўлса керак. 

Суҳроб Холбеков тайёрлади