80 million evrodan 35 million evrogacha yohud bo‘lajak Messimi yoki Krkich?

"Transfermarkt" portali La Liganing narxi pasaygan futbolchilarini e’lon qildi. U erda birinchi o‘rinni Ansu Fati egalladi. Vingerning yangilangan narxi 35 million evroga baholandi. 

Ansu "Barselona"da Messining davomchisi sifatida qaralar edi. Ammo ko‘plab jarohatlar uning darajasini pasayishiga asosiy omillardan biri bo‘ldi. Ispanning 2020 yildagi transfer narxi 80 million evro hisoblangan. Ammo bu futbolchining so‘nggi muvaffaqiyatlaridan biri bo‘lib qolmoqda. "Barsa"ning Chempionlar ligasining eng yosh debyutanti, klub tarixida eng yosh gol urgan futbolchi kabi bir qancha rekordlar sohibini ushbu natijalarini qarigan paytida nevaralariga maqtanib o‘tirishdek yomon kelajak kutib turgan bo‘lishi mumkin. Albatta, bunday statistika hammada ham yo‘q. Ammo "Barsa"da faoliyatini boshida rekord o‘rnatib, keyinchalik umuman taniqsiz klublarda o‘ynab yurgan futbolchilar bor. Oddiy misol - Boxan Kirkich. U kataloniyaliklarning ligada eng yosh gol urgan va ChLda eng yosh maydonga tushgan futbolchisiga aylangan edi. Ebtibor qilsa, sobiq Messining jamoadoshi faoliyatini Fati bilan deyarli bir xil ko‘rinishda boshlagan. Kirkich 32 yoshida butsalarini mixga ildi. So‘nggi bor "Vissel Kobe" uchun o‘ynadi. Fatini ham mana shu insonning taqdiri kutib turgandek, go‘yo.

Bir vaqtlar katta marralarni zabt etishi kutilgan va 10-raqam topshirilgan Ansuning bugungi kunda jamoadagi holatiga havas qilib bo‘lmaydi. U klub tarkibida 38 ta o‘yinda maydonga tushdi. Bu ko‘rsatkichning boshqacharoq varianti ham bor. Fati ushbu mavsum maydonda 1341 daqiqa ko‘rinish bergan. Taqqoslash uchun, Rafinyada bu statistika 2130 daqiqani tashkil qiladi. Ma’lumot uchun, qahramonimiz hali jarohatdan aziyat chekkani yo‘q. U mavsumni deyarli safdan chiqmagan holda o‘tkazmoqda. Ya’ni Fatining kam match o‘tkazishiga bahonalar topilmayapti. Demak, Xavi unga ishonmay qo‘ygan va yozda ketishiga qarshilik kilmaydi, degan fikr hayoldan o‘tishi mumkin. Balki rostan ham shunday bo‘lar. Avvalroq, Laporta bitta vinger sotishilishi mumkinligini inkor qilmagan edi. Ispaniya nashrlari esa ushbu transfer Fati yoki Torres bo‘lishini tahmin qilmoqda. Bu boshqa mavzu. Ansu yoki Ferrandan qaysi biri klubni tark etishi kerak va qaysi biri ketishga yaqinroq ekanligini 37-turdan keyin muhokama qilish maqsadga muvoffiq bo‘lsa kerak. 

Suhrob Xolbekov tayyorladi