"Боруссия" Дортмунд "Атлетико" ҳужумчиси учун асосий даъвогарга айланди

Мадриднинг "Атлетико" клуби ҳужумчиси Кевин Гамейро фаолиятини Дортмунднинг "Боруссия" клубида давом эттириши мумкин. Бу ҳақда Marca нашри хабар бермоқда.

Унга кўра дортмундликлар 31 ёшли франциялик футболчи учун 23 млн евро таклиф қилишган. Ўз навбатида унга харидор бўлаётган бошқа бир клуб – “Валенсия” эса 14 миллион бермоқчи. Шундан келиб чиқиб айтиш мумкинки немис клубининг ушбу курашда “кўршапалаклар”дан кўра имкониятлари юқорироқ баҳоланмоқда.

Айтиш керакки, Гамейро “Боруссия” сафида ўтган мавсум “Челси”дан ижарага олинган ҳужумчи Миши Батшуайининг ўрнини эгаллайди.

Маълумот учун, Гамейро ўтган мавсум “Атлетико” сафида жами 37та ўйинда майдонга тушиб, ўз ҳисобига 11та гол ёздириб қўйишга эришган.