Денис Истоминнинг "бензини" тугаб қолди
Ўзбекистоннинг биринчи рақамли ракеткачиси Денис Истоминнинг "Катта дубулға" туркумидаги Австралия очиқ чемпионатида кўрсатган ўйини ҳамон мутахассислар томонидан эътироф этилмоқда.
Хусусан, россиялик машҳур теннисчи ва ҳозирда мураббийлик қилаётган Андрей Чесноков ҳам Денис Истомин ўйини ҳақида гапирди.
Журналист таниқли мутахассис Андрей Чесноковга савол берар экан, тўртинчи босқич учрашувида Денис Истоминнинг кутилмаганда сонидан жароҳат олиши болгариялик Григор Димитровнинг ғалаба қозонишида бош омил бўлганини таъкидлади.
- Менимча, Денис Истоминнинг "бензини" тугаб қолди, - деди бу саволга жавоб берган Андрей Чесноков. - Денис кетма-кет учинчи марта сенсацион натижа қайд этолмади. Бу қаторасига учинчи марта марафон югургандек гап. Охир оқибат бу унинг жисмоний ҳолатига таъсир қилди.
Денис Истомин Автсралия очиқ чемпионатида иккинчи рақамда сараланган Новак Жокович, 31-рақам эгаси Пабло Карреньо Бустани мағлуб этиб, чорак финал йўлланмаси учун баҳсда жароҳат сабабли жаҳон рейтингида 15-ўринда бораётган Григор Димитровга ютқазиб қўйди.
Фикрлар