Левининг “Тоттенхем”даги энг яхши ва энг ёмон трансферлари

“Тоттенхем”нинг трансфер бозоридаги сиёсати яна бир бор кўпчиликни ўйлантирмоқда. Бу ҳолат клуб мухлисларининг ҳайратига сабаб бўлаётгани ҳам бор гап.

Клуб хўжайини Даниель Леви трансфер бозори ниҳоясида ўзини кўрсатишга уриниб кўриши мумкин. Маурисио Почеттино бозор ёпилишига қолган сўнгги кунларда тўртта трансферни амалга ошириш кераклигини айтмоқда, шунингдек “тақачилар” бирорта футболчини олиб келмаслигини ҳам очиқ-ойдин тилга олди.

2001-йилда Леви клуб бошқарувига келганидан бери сўнгги паллаларда амалга оширган энг яхши ва энг ёмон трансферларини ёдга олиш зарур. Қуйида улар билан танишинг.

Энг яхшилари

5. Мусса Дембеле, 2012-йил ёзи. Нархи: 15 миллион фунт

2010-йилда Англияга кўчиб ўтган Дембеле “Фулхем” сафида маҳоратли ҳужумчи эканини исботлай олди.  2012-13-йилги мавсумдан бошлаб у “тақачи”га айланди.

“Манчестер Юнайтед”га қарши “Олд Траффорд”да кўрсатган ўйини туфайли ёзги трансфер бозорининг сўнгги дақиқаларида бельгиялик футболчини “Тоттенхем” ўз сафига қўшиб олди. Лондондаги фаолияти дебюти жароҳатлар билан кечган бўлсада, Дембеле Почеттино қўли остида ўзини қайта топишга эришди ва Премьер Лиганинг энг яхши ярим ҳимоячиларидан бирига айланди.

4. Жонатан Вудгейт, 2008-йил 28-январь. Нархи: 8 миллион фунт

Шимолий Лондонда кўп вақтини жароҳатлар билан ўтказган бўлсада, Вудгейт сафда эканлигида Ледли Кинг билан ажойиб ҳимоя жуфтлигини ҳосил қилди. Аксига олиб Кинг ҳам жароҳат олишга мойил эди.

Вудгейт 2008-йилда “Тоттенхем”нинг ягона соврини бўлиб турган Лига Кубоги финалидаги голи билан ҳам ёдда қолган.

3. Робби Кин, 2002-йил 31-август. Нархи: 7 миллион фунт

“Тақачилар” 2002-йилда “Лидс”дан Кинни олиб келди ва у Мартин Йол қўли остида “Уайт Харт Лейн”да ҳал қилувчи футболчига айланди.

Ирландиялик ҳужумчи Кингнинг йўқлигида жамоани сардор сифатида майдонга олиб тушди ва 2008-йилги Лига Кубогида ғалаба қозонишига катта ҳиссасини қўшди. Ўшанда у Димитар Бербатов билан ҳамкорликда ажойиб жуфтликни яратган эди.

“Тоттенхем” уни бошқа трансфер бозорида қайта жамоага олиб келди. 2009-йил январида “тақачилар” сафига қайтган Кин олдинги спорт формасида эмаслиги маълум бўлди.

2. Деле Алли, 2015-йил 2-февраль. Нархи: 5 миллион фунт

Алли “Тоттенхем”нинг асосий таркибига 2015-16-йилги мавсумнинг дастлабки босқичида кириб борди. Англиянинг келажаги сифатида кўрила бошланган ёш иқтидор эгасини 5 миллионга сотиб олган “Тоттенхем” раҳбариятига бир қанча грандлардан жиддий таклифлар келиб туша бошлади.

22 ёшли Алли қандай футболчига айланишга эришганини айтиш мумкин. Унинг катта ўйинларда муҳим голларни киритиш қобилияти бориги у ҳозиргидан ҳам жиддийроқ даражага эришишига имкон беради.

1. Рафаель Ван Дер Варт, 2010-йил 1-сентябрь. Нархи: 8 миллион фунт

Бундан саккиз йил аввал Леви ва Реднапп “тақачилар” мухлисларининг кўнглидан жой олган трансферни амалга оширишган эди.

Голландиялик футболчи клубнинг Чемпионлар Лигасидаги дебютида муҳим қисмга айланган эди. Унинг тажрибаси Реднапп жамоасига чорак финалга қадар етиб боришига ёрдам берган эди.

Аммо бир неча жиддий жароҳатлар унинг клубдаги икки йиллик фаолиятига нуқта қўйишига сабаб бўлди. Шунга қарамай Ван Дер Варт клуб мухлисларини қалбидан жой олди. Сўнгги лаҳзалардаги трансферлар ҳам баъзан ижобий бўлиши мумкинлигига яққол далил.

Энг ёмон трансферлар

5. Жорж-Кевин Нкуду, 2016-йил 31-август. Нархи: 11 миллион фунт

Почеттино Лондонга келганида таркибга маҳоратли вингер керак деган фикрда эди. Гарчи айни вақтда буни Лукас Моура ажойиб тарзда бажараётган бўлса, ўз вақтида Почеттино Нкуду билан тажриба ўтказиб кўрган эди.

Иш кўнгилдагидек кетмаганини айтиш осон. 23 ёшли футболчи асосий таркибга кириши учун 18 ой мухлат берилди. Ўзгариш бўлмагандан кейин клуб Нкудуни “Бёрнли”га ижарага бериб юборди. Футболчи у ерда ҳам қийинчиликка учрамоқда.

4. Фернандо Льоренте, 2017-йил 1-сентябрь. Нархи: 12.1 миллион фунт

“Тоттенхем” ёзги трансфер бозорини сўнгги дақиқасида унинг тажрибасидан фойдаланиши мумкинлигига ишониб буни амалга оширган эди. 33 ёшли испаниялик ҳужумчи янги жамоасидаги дебют мавсумида барча мусобақаларда атиги 5 гол урди. Премьер Лига доирасида эса битта гол билан чегараланди.

Уни Харри Кейнга муносиб ўринбосар бўлишини кутишганди. Бироқ сўнгги дақиқадаги ҳарид ўзини оқламади.

3. Гжегож Расьяк, 2005-йил 1-сентябрь. Нархи: 3 миллион фунт

Клубнинг энг омадсиз трансферлари ҳақида гап кетганда бу номни эсламасликнинг иложи йўқ. Польшалик ҳужумчи Расьяк клуб учун атиги 8 ўйинда иштирок этган ва бирорта гол урмаган.

2. Жилберто, 2008-йил 31-январь. Нархи: 1.9 миллион фунт

Агарда бразилиялик чап қанот ҳимоячиси “Тоттенхем” учун қандай қилиб омадсиз трансфер бўлганини сўрасангиз, унинг статистикасига назар солинг. У клуб учун ўтказган 11 ўйинининг 3 тасида захирадан майдонга тушган. Бундан ҳам баттари бўлмаслиги аниқ.

1. Луис Саа, 2012-йил 1-2-февраль. Нархи: эркин агент

“Тоттенхем” мухлислари орасида танилмаган Саа Расьяка билан клубнинг энг омадсиз трансферини ташкил қилади.

Чемпионат соврини учун кутилмаган курашда Реднапп жамоасини номдор футболчи билан тўлдирмоқчи бўлди. Бироқ Саа трансфери ўзини умуман оқламади. Ўз даврини ўтаб бўлган француз ҳужумчиси “тақачилар”га борини бера олмади. Оқибатда клубдан Реднапп ҳам кетди, Саа ва у билан бирга келган Нелсон ҳам олти ойлик шартномадан кейин “Тоттенхем” билан хайрлашди.

Эркинжон Ғайбуллаев тайёрлади.