“Немис Месси”си Макс Майерга нима бўлди?

Бундеслиганинг энг иқтидорли ёш футболчиси сифатида бир пайтлар тилга олинган 22 ёшли футболчи “Шальке”ни тарк этганидан бери ўзига янги жамоа топа олганича йўқ. Хўш, “немис Месси”сининг келажагига нима таъсир қилди?

1.70 метрлик йигитча бир вақтлар дунё футболи назарига тушган эди. 17 ёшидаёқ дебютини ўтказган Майер паст бўйли эканлигига қарамай, ҳақиқий эркаклар ўйинида ўзини кўрсата олганди. Клуб академияси маҳсулоти бўлган юлдузча жамоасининг совринлар учун курашишида ва Европанинг гранд клубларини ер тишлатишда катта ёрдами тегиши ҳақида тинмай бонг урилганди.

Дебютини ўтказган дастлабки мавсумида у 10 тача чемпионат учрашувини ўтказган бўлсада, иқтидори етарли эканлигини намойиш қилганди. У воқеалар ривожини олдиндан ўқий оладиган моҳир плеймейкер ҳислати борлигини кўз-кўз қилганди.

Кейинги мавсумда эса у профессионал футболдаги тўлиқ мавсумини ўтказди. Шунингдек, у миллий чемпионат доирасида олти гол уришга эришди. Чемпионлар Лигасида мунтазам иштирок этди.

Худди Лионель Месси тарихидек. “Шальке”нинг катта умиди ҳисобланган Макс Майер 18 ёшидаёқ Раулнинг 7 рақамини олиб қўйган эди. Ўзининг қаҳрамони Мессидан саккиз ёш кичик бўлган немис футболчиси аргентиналик юлдузнинг ҳаёт йўлини такрорлай олишини таъкидлаганди.

“У менинг вазифам модели ҳисобланади. Ундан кўп нарсани ўрганишим мумкин. У дунёнинг энг яхши футболчиси” – деган эди Майер.

“Шальке”даги дастлабки бир неча мавсумни у ҳужумкор ярим ҳимоячи амплуасида ҳаракат қилган бўлсада, у кўп вақтини заира ўриндиғида ўтказди. 2016-17-йилги мавсумда эса унинг ўйин амалиёти жуда камайиб кетди. 2017-июнида келган янги бош мураббий Доменико Тедеско Майернинг машғулотларда кўрсатган натижасидан ўз ҳайратини яширмаган бўлсада, ўйин вақтида барибир Леон Горецка, Амин Харитларни афзал кўрди.  Ёш мураббий Майерга ўзининг севимли амплуаси – “ўнлик”ни топширмади.

Ўзидан олдинги ҳамкасблари каби Тедеско Майерни “алдамчи тўққизлик” вазифасида синаб кўрди. Бу нуқтада эса “немис Месси”си ўзини эркин ҳис қилмади ва асосий таркибдаги ўрнини йўқотиб борди. Мураббий эса унинг машғулотларда кўрсатган жонбозликлари ҳурмати асосий таркибга киритиш йўлларини қидира бошлади.

Тедеско янги формула ишлаб чиқди ва Майерни таянч ярим ҳимоячисига айлантирди. Бу ерда у ўйинни ўқий олиш қобилияти туфайли анча ўсишга эришди. Ўтган мавсумда у узатмаларни амалга ошириш бўйича фақатгина “Бавария” вакиллари – Корентин Толиссо, Тьяго ва Хамеслардан ортда қолди.

Майер Тедеско қўли остида қайта туғилди, дейишимиз мумкин. Бироқ клуб раҳбариятини унинг натижалари умуман қониқтирмади. Россияда бўлиб ўтган Мундиалга бора олмаган футболчини шартномасини узайтиришни “Шальке” муносиб кўрмади. Бундан жаҳли чиққан футболчи ва унинг агенти 30-июнда шартнома муддати тугагач клубдан кетишини маълум қилди. Унинг собиқ жамоадоши Леон Горецка январдаёқ “Бавария” билан келишиб олганди. 1-июлдан эса мюнхенликлар сафига расман кўчиб ўтди. Бир вақтлар “немис Месси”си дея таърифланган футболчи клубдан кетганидан кейин тўрт ҳафта ўтган бўлсада, ҳамон янги жамоа сафида эмас.

Майер “Шальке”ни пул учун тарк этганини инкор қилди. У бу ҳақида Bild га берган интервьюсида гапириб берди: “Мен шунчаки “Шальке”да қолиш ва Хайдел қўли остида ишлашни истамадим. Бори шу.” Бир қанча клублар билан боғланганига қарамай, у бирорта клуб билан шартнома имзолаганича йўқ. Гарчи у эркин агент бўлсада, клублар унинг йирик маош – ҳафтасига 77 минг фунт сўраётгани сабаб бунга розилик билдирмаяпти. “Арсенал” ва “Ливерпул” ярим ҳимоячи учун бунча пул тўламасликларини дарҳол маълум қилишган.

Ўз вақтида “Немис Месси”си дея таъриф этилган Макс Майер афтидан ўзининг молиявий талабларини қайта кўриб чиқиши керак. Акс ҳолда, жамоасиз қолиб кетиши ҳеч гап эмас.

Эркинжон Ғайбуллаев тайёрлади.