Роналду йўқми? Муаммо йўқ!

“Реал Мадрид”ни клуб тарихидаги барча даврларнинг рекордчиси Криштиану Роналду тарк этган бўлсада, “Ювентус”га қарши Халқаро Чемпионлар Кубоги доирасидаги ўртоқлик учрашувида “қироллик клуби” собиқ футболчисининг ўрнини тўлдириш учун кўп маблағ сарфлаб янги ўринбосар сотиб олиши шарт эмаслигини исботлади. Goal нашри журналисти Бен Хейвард бу ҳақида мулоҳаза юритди.

Ҳеч ким Роналдунинг ўрнини тўлдириш осон бўлади, дегани йўқ. Бироқ “қаймоқранглилар” таркибида беш карра “Олтин тўп” соҳибининг йўқлигини билдирмайдиганлар етарли эканлигини кўрсатиб беришди.

Хабарингиз бор, португалиялик суперюлдуз “Реал”ни ўтган ойда 100 миллион евро эвазига “кекса синьора”га алмаштирганди.

Ўшандан кейин мадридликларни Роналдунинг ўрнига ақл бовар қилмас трансфер нархига эга футболчилар билан боғлай бошлаганди. Бироқ шанба куни тақдирнинг ҳазили билан айнан Роналдунинг янги жамоасига қарши беллашувда Мадрид клуби янги юлдузга эҳтиёж сезмаётганини кўрсатиб қўйишди.

“Қаймоқранглилар” Вашингтонда бўлиб ўтган учрашувни Дани Карвахалнинг автоголи билан бошлашди ва бу мухлисларнинг ўйин олди хавотирларини орттириб юборди. Бироқ биринчи бўлим тугаши арафасида Гарэт Бейл 2018-19-йилги мавсумда жамоасининг асосий футболчисига айланиши мумкинлигини намойиш қилди ва узоқ масофадан ажойиб тарзда “Юве” дарвозасига гол урди ва мувозанатни тиклади.

“Реал” май ойида Чемпионлар Лигаси финалида “Ливерпуль”ни ютганидан кейин иккала юлдуз – Роналду ва Бейл “Сантьяго Бернабеу”ни тарк этишларига шаъма қилишганди.

Роналду албатта кейинроқ бу гапларининг устидан чиқди ва сенсацион тарзда “Ювентус”га ўтиб кетди.

Португалиялик юлдузнинг кетиши уэльслик футболчига жамоада асосий юлдузга айланишига йўл очиб берди. Ўтган мавсумда Бейл Зидан қўл остида спорт формасида бўлганида ҳам асосий таркибда тез-тез кўриниш бермади. Кам ўйин амалиёти эса “Тоттенхем”нинг собиқ футболчисини жамоадан кетмоқчи бўлишига сабабчи бўлганди.

Азар, Килиан Мбаппе ёки Неймарларнинг “Сантьяго Бернабеу”га келиши ҳақидаги хабарлар тинмаётган бир пайтда Бейл янги мавсумда ким асосий юлдуз бўлиши мумкинлигини барчага кўрсатиб қўйди.

Бейл бир таймда ўзини кўрсатган бўлса, иккинчисида Марко Асенсио ва Винисиус Жуниор масъулиятни ўз зиммаларига олди.

Ушбу жуфтлик захирадан майдонга туширилгани заҳоти ҳисобдаги устунликни жамоаси фойдасига ошириб беришди. Испаниялик футболчи бразилиялик ёш иқтидор эгасининг юришларини моҳирлик билан якунлади.

Асенсио ўзи учун ноодатий позиция – “алдамчи тўққизлик”да ҳаракат қилди ва майдонга тушганидан ўн дақиқа ўтиб ҳисобни ўзгартирди.

22 ёшли футболчи ўтган икки йилдан бери жаҳоннинг истиқболли юлдузи бўлиши айтиб келинмоқда. Ўтган мавсумда ўйини бироз қовушмаган бўлсада, янги мавсумда у кўпроқ ўйин амалиётига эга бўлиб ўйинини кучайтириши мумкин.

Винисиус эса эндигина Бразилиядан келиб қўшилди. 18 ёшли ҳужумчи “ФедЭкс”дагиларни ўзининг техникаси ва финтлари билан ҳайратлантирди. У бу билан “Реал”нинг янги мавсумида жамоасига сезиларли таъсир кўрсата олиши мумкинлигини кўрсатди.

“Реал” “Ювентус”ни 3-1 ҳисобида мағлуб этиб ХЧК дан ҳам аҳамиятлироқ хусусиятни қўлга киритди. Агарда клуб раҳбарияти Роналдуга ўринбосар олиб келмаган тақдирда ҳам Хулен Лопетеги таркибида собиқ юлдузнинг ўрнини кимлар боса олишига жавоб топиб бўлди.

Эркинжон Ғайбуллаев тайёрлади.