АГМК янги легионер билан 3 йиллик шартнома тузилганини эълон қилди

Туркияда қишки ўқув-машғулот йиғинларини ўтказаётган АГМК жамоаси ўз сафига грузиялик чап қанот вингери Иракли Рухадзени қўшиб олди.

Схалтубо шаҳрининг «Самгурали» клуби аъзоси бўлган Рухадзе АГМК мураббийлар штаби назарига тушганига анча бўлганди. Унинг жамоаси ҳам ҳозирда ўқув-йиғин машғулотларини Туркияда ташкил этмоқда. Айнан ўша ерда томонлар музокаранинг якуний босқичини ўтказдилар ва Олмалиқ клуби Иракли Рухадзенинг трасфер ҳуқуқини тўлалигича сотиб олди ҳамда грузиялик легионер АГМК билан 3 йиллик шартнома имзолади.

1996 йилнинг 28 октябрида туғилган ушбу футболчи ўз пайтида Грузия ёшлар терма жамоасига жалб этилган. Унинг статистикасига эътибор қаратсак, Иракли ўтган мавсум Грузия чемпионатида 30 та ўйинда майдонга тушиб, 13 та гол урди (Грузия чемпионатида 2-кўрсаткич) ҳамда шерикларига 2 та голли пас берди. Бутун фаолияти давомида эса футболчи 138 та учрашувда 38 та гол урган ва 12 та голли узатма берган, - дея хабар бермоқда АГМК матбуот хизмати.