Акбар Тўраев: "Олдиндан башорат қилмайлик, лекин..."

Фарғонанинг “Нефтчи” клуби жорий йилги Суперлигани анча барқарор ва ишончли бошлади. 5 та турдан кейин бу жамоа мағлубиятсиз ҳолда 4 та ғалаба ва 1 дуранг билан мусобақа жадвалида 1-ўринда кетяпти.

Бу сафар “Нефтчи” водий дербисида “Андижон” билан жиддий ўйинни ўтказди. Кескин курашлар остидаги баҳсда фарғоналиклар 2:0 ҳисобида ғалаба қозонди. Ўша учрашувнинг энг яхши футболчиси дарвозабон Акбар Тўраев бўлди. Боиси, у дербидаги беллашувда ажойиб сейвлари орқали жамоасини бир неча бор голлардан қутқариб қолди.

Эртаси куни иккала жамоанинг ўринбосарлари яна ўша “Истиқлол” стадионида куч синашишди. Акбар Тўраев эса ушбу учрашувни кузатиш учун оиласи билан стадионга келди. Фурсатдан фойдаланиб, унга саволлар билан юзландик.

- “Нефтчи” водий дербисида “Андижон” устидан ғалабага эришди. Ўша учрашув ҳақида нима дея оласиз?

- Нима дейишим мумкин? Дерби ҳар доим ўз номи билан дерби. Курашларга бой ўтади. Иккала жамоа майдонга фақат ғалаба учун чиқади. Бу учрашувда шундай ҳам бўлди. Тезкор гол урганимиз бизга қўл келди. Ҳимояда тартибли ўйнаб, охиригача чидадик. Футболчимизга кўрсатилган қизил карточка ўйинимизга бироз таъсир қилди. Шундан сўнг ҳисобни ушлашга ҳаракат қилдик. Худога шукр, натижани сақлаб қолиб, муҳим ғалабани қўлга киритдик.

- Бу ғалабада бевосита сизнинг ҳам муносиб хизматингиз бор. Боиси, бир неча вазиятда “Нефтчи”ни муқаррар голлардан сақлаб қолдингиз. Бу учрашувга алоҳида тайёрланганмидингиз?

- Дарвозабоннинг иши жамоасини голлардан қутқариб қолиш. Дерби бўлгани учун “настрой” ҳам шунга яраша эди. Албатта, ҳар учрашувда 100 фоиз кучимизни бериб, ақл-идрокимиз етгунича ўйнаб, ғалабаларга ўз ҳиссамизни қўшишга ҳаракат қилиб келяпмиз. Ҳамма учрашувга шундай тайёрланамиз. Дерби барибир ўз номи билан дерби. Балки шунинг учун ушбу ўйинга янада жиддий тайёргарлик кўрдик. Рақиб жамоанинг ўйинларини кузатдик ва ўрганиб чиққандик. Шуларнинг ҳисобига ва тўғри тактикада ўйнаганимиз эвазига уч очкони қўлга киритдик.

- Қолаверса, учрашувнинг энг яхши футболчисига айландингиз. Бу ҳақида ўйлаганмидингиз?

- Буни экспертлар ҳал қилади. Майдонга тушганимда фақат ўз ишимни қиламан. Бутун жамоамиз энг яхшиси бўлди.

- “Нефтчи” мағлубиятсиз ҳолда турнир жадвалида пешқадамлик қиляпти. Бунинг асосий сабаби нима билан боғлиқ?

- “Нефтчи”да яхши коллектив йиғилган. Футболчилар бир-бирига ишонишяпти. Олдимизга мақсад қўйганмиз ва мақсад сари қадам ташляпмиз. Албатта, бунда мураббийларнинг ҳам қўли бор. Улар бизни ўйинларга яхши тайёрлашяпти, майдондан ташқарида ҳам руҳлантириб, мотивация беришяпти.

- Нима деб ўйлайсиз, бу йил “Нефтчи”дан чемпионликни кутсак бўладими?

- Жўжани кузда санаймиз. Олдиндан гапириб, башорат қилмайлик. Лекин биз охиригача курашамиз. Айтганимдек, йигитлар билан олдимизга мақсад қўйганмиз. Шунга эришишга ҳаракат қиламиз.

- Эшитишимча, клубда футболчилар олдида қарздорлик бор экан...

- Молиявий муаммолар ҳамма жамоада бор. Бу хавотирли ҳолат эмас. Раҳбарият ҳаммасини ёпишга ваъда берган. Пул биринчи ўринда эмас. Футболчиларни ўз имиджи ҳам бор ва ўша мақсад сари интиляпмиз. Барибир пулларни тўлаб беришади.

- Кўриб турибмизки, сиз оилангиз билан “Нефтчи” U-21 иштирокидаги ўйинни стадионда кузатяпсиз. Доим ўйинларга оилангиз билан келасизми?

- Фарғонада бўлганимизда албатта ўйинларга келиб турамиз, имкон қадар.

- Чемпионат сиз кутган даражада бошландими ёки...

- Деярли барча клублар хорижда тайёргарлик кўришди. Шу боис мавсумга яхши ҳозирлик кўрилган. Шунинг ҳисобига чемпионат қизиқарли. Ҳар бир учрашув жиддий курашлар остида ўтяпти, осон кечмаяпти.

Шуҳратбек Жўраев.