Александр Петров: Бизга охиригача ишонаётганларга раҳмат

Таиланд пойтахти Бангкок шаҳрида ўтаётган Футзал бўйича клублар ўртасидаги Осиё чемпионати доирасида кеча АГМК Ироқнинг "Нафт Ал Васат" клубини ишончли тарзда мағлуб этди ва 2-турдан кейин гуруҳда иккинчи поғонага кўтарилиб олди.

"Нафт Ал Васат" устидан қозонилган ғалабадан сўнг олмалиқликлар бош мураббийи Александр Петров клуб матбуот хизматига қуйидаги фикрларни билдириб ўтди:

— Аввало биз учун қайғурган ва охиригача бизга ишонган барча мухлисларни ғалаба билан табриклайман. Уларга раҳмат айтаман. Чунки айнан уларнинг кўмаги ва ишончи бизни руҳлантириб турибди. Ўйинга келадиган бўлсам, баҳс давомида жамоамиз ғалабага ташна ва ютуққа лойиқ ўйнади. Натижада ғалаба ҳам биз тарафда бўлди. Ишонч билан айтаманки, мазкур баҳсда ғалабага муносиб ўйнадик. Гуруҳда чиқиш учун имкониятни сақлаб қолиш учун ғалаба зарур эди ва биз бунга эришдик. Эндиги мақсад плей-офф йўлланмасини қўлга киритишдаги ҳал қилувчи қадамни қўйиш. Эртанги беллашувда биз бу ишни амалга ошириб, юртимиз ишқибозларига қўшалоқ байрамни туҳфа этмоқчимиз. Гарчи "Ал Райян" гуруҳда аутсайдер бўлиб турган бўлсада, мазкур ўйинга жиддий ёндошиши талаб этилади. Қитъа чемпионатида осон ўйинлар бўлмайди.

???? Қайд этиш керакки, мазкур ғалаба жамоамиз учун Осиё чемпионатлари тарихидаги илк ютуққа айланди ва бу гуруҳдан чиқиш имкониятини сақлаб қолишга ёрдам берди. Энди эса жамоамиз эртага Қатарнинг "Ал Райян" клубига қарши ўйнайди. Мазкур баҳсдаги эҳтимолий ғалаба Александр Петров бошчилигидаги АГМК футзал жамоасига плей-офф йўлланмасини тақдим этиши мумкин. Айни пайтда "B" гуруҳидан ўрин олган жамоамиз 3 очко билан иккинчи ўринни эгаллаб турибди. Биз билан бир хил очко жамғарган ва тўплар нисбати яхшироқ кўрсаткичга эга Ироқнинг "Нафт Ал Васат" клуби эса ўзаро ўйинлар натижасига кўра учинчи поғонада турибди. Учинчи турдаги рақибимиз "Ал Райян" эса ҳар иккала беллашувни ютқазган ва ҳозирча аутсайдер мақомида. Пешқадам Вьетнам клуби "Тай Сон Нам" ҳисобида эса 6 очко мавжуд.

Хуш, ўринли савол туғилади: Агарда учинчи турда АГМК футзал жамоаси "Ал Райян"ни мағлуб этса ва иккинчи ўйинда "Нафт Ал Васат" пешқадам "Тай Сон Нам" устидан ғалаба қозонса, унда турнир жадвалидаги ўрин қай тариқа тақсимланади?

Регламент бўйича биринчи ўринда ўзаро ўйин ҳисобга олинади. Агарда учала жамоа тўплаган очколар сони бир хил бўлса, унда тўплар нисбати асосий ўринга чиқади. Айни пайтда жамоамиз киритган ва ўтказиб юборган голлари фарқи -1ни ташкил этмоқда. "Нафт Ал Васат"да эса бу кўрсаткич плюс 3га тенг. Пешқадам "Тай Сон Нам"да эса вазият янада яхшироқ, яъни 7та гол фарқи мавжуд. Бу дегани охирги турда жамоамиз олдида иккита йўл мавжуд: Бири камида 7та тўп фарқи билан "Ал Райян"ни мағлуб этиш ва гуруҳдаги нариги ўйин натижасидан беҳавотир ўтириш. Иккинчи вариант эса ғалаба қозониш ва иккинчи жуфтликда камида пешқадам "Тай Сон Нам" ироқликларга ютқазмаслигини кутиш. Қулай тарафи, нариги учрашув бизнинг ўйиндан аввалроқ ўтади ва қандай натижа қайд этиш кераклигини билган ҳолда ўйинга тушамиз.

Эслатиб ўтамиз, гуруҳдаги ҳал қилувчи 3-тур ўйинлари эртага бўлиб ўтади. Унда АГМК "Ал Райян" билан беллашса, "Нафт Ал Васат" "Тай Сон Нам" билан куч синашади.

"B" гуруҳи, 3-тур.
10:00. "Таи Сон Нам" - "Нафт Ал Васат"
12:30. "Ал Райян" - АГМК ("Спорт ТВ"да тўғридан-тўғри эфирда)