Александр Усик ва Тайсон Фьюри трилогияси ўтказилади, агар...

Собиқ мутлақ жаҳон чемпиони Александр Усик ўзининг асосий рақиби Тайсон Фьюрига қарши трилогия ўтказиш имкониятини кўриб чиқишга тайёр. Бу ҳақда украиналик жамоасининг директори Сергей Лапин маълум қилди.

Трилогия ҳақидаги гап-сўзлар "Лўлилар қироли" яна бир бор Усик билан рингга чиқишга тайёр эканини омма олдида айтганидан сўнг яна фаоллашди. Фьюри бу таклифни Энтони Жошуага қарши баҳс бўйича музокаралар барбод бўлган тақдирда амалга ошириш мумкинлигини билдирган. Украиналик чемпион томони бу чақириққа тезкор жавоб қайтарди, бироқ аниқ шартларини қўйди ва ўзининг бошқа устувор йўналишларини ҳам белгилаб олди.

"Лапиннинг тасдиқлашича, Усик учун навбатдаги рақиб — Деонтей Уайлдер. Ҳозирча бу тўқнашув учун шартнома имзолаш ва расмийлаштириш керак. Александр жамоаси Фьюри билан трилогияни эса фақат Уайлдерга қарши жангдан сўнг кўриб чиқиши мумкин", — дея хабар беради "King Boxing Media" ўзининг ижтимоий тармоқдаги расмий саҳифасида.

Аввалроқ, Александр Усик ва Деонтей Уайлдер ўртасидаги баҳс келгуси йил март ойида ўтказилиши маълум қилинганди.