Александр Хомяков: "Тақвим зичлигидан кўп куч йўқотяпмиз"

Суперлига 7-туридан ўрин олган "Насаф" – "Бухоро" (1:1) учрашувидан кейин "Бухоро" бош мураббийи Александр Хомяков матбуот анжуманида иштирок этди.

- Ўйин ҳақида фикрингиз?

- Баҳс ўзига яраша қизиқарли кечди, чунки ўзбек футболининг энг яхши жамоаларидан бирига қарши кураш олиб бордик. Ғалаба қозонишни мақсад қилгандик, лекин бунга бироз вақтли экан. Ўйин "Насаф" устунлигида кечди, рақибли деярли бутун учрашув давомида вазиятни назорат қилди. Кўпроқ вазиятларни ҳам "Насаф" яратди. Биз биринчи таймда мутлақо "тишсиз" кўриндик. Кўп нарса ўхшамади. Хайрият, иккинчи бўлимда нимадир қилишга эришдик. Гол урдик, бир очкони қўлга киритдик. "Насаф" билан бир очко яхши натижа деб ўйлайман. Стадионга келган мухлисларга раҳмат айтаман.

- Жавоҳир Рўзиевнинг захирага олиниши сабаби нимада? У яхши ўйин кўрсатаётганди.

- Эътибор берган бўлсангиз, биз асосан голдан кейин футболчи алмаштиришни бошладик. Майдон марказини янгилашимиз керак эди, чунки ўртадагилар толиқиб қолди. Гол ўтказиб юборгач, қарши ҳужумни узун тўп узатишлар орқали йўлга қўйдик ва бунинг учун бизга бўйдор футболчилар зарур эди. Тақвим зичлигидан кўп куч йўқотяпмиз. Тез-тез ротация қилишга тўғри келяпти. Шунинг учун захирани амалга оширдик.

- Кетма-кет ўйинларга қандай тайёргарлик кўряпсиз?

- Бу ўринда биринчи навбатда тикланиш муҳим рол ўйнайди. Шундан сўнг футболчилар ҳолатига қараб машғулот олиб боряпмиз. Энг катта "нагрузка"ни эса жамоамиз шифокорлари оляпти. Чунки футболчиларни тиклашда уларнинг меҳнати катта.