Алишер Никимбаев: Бу масалага ЎФАдан ташқари спортимизни тепасидагилар ҳам аралашган

Ўзбекистон Миллий терма жамоасига яқин вақтлар ичида португалиялик мураббий Пауло Бенто бош мураббий сифатида тайинланиши кутиляпти. Kun.uz нашри ушбу вазият юзасидан бир қатор таниқли спорт мутахассислари фикр билдирган видеолавҳани ўз You Tube саҳифасига жойлаштирди. 

Қуйида таниқли спорт мутахассис Алишер Никимбаев ушбу видеолавҳада билдирган фикрлари билан танишиб чиқишингиз мумкин: 

- Пауло Бентонинг Ўзбекистон Миллий терма жамоасига тайинланиши мен учун сюрприз бўлмади. Кимдадир нима учун Пауло Бенто деган савол пайдо бўлиши мумкин. Менимча, 2-2,5 ой олдин термамизга чет элдан мураббий келиши аниқ бўлган. Дастлаб, Йоахим Лёв ҳақида янгиликлар чиқди. Бу ҳақда Германиянинг "Bild" нашри ҳам ёзди ва ҳаттоки бу ишга Германия элчихонаси ҳам аралашган. Демоқчиманки, чет элдан мураббий олиб келиш қарори нафақат Ўфа томонидан, балки, Ўзбекистон спортини тепасидагилар томонидан қабул қилинган. Шунинг учун, чет элдаги ваколатхоналар ҳам бунга кўмаклашган. Нима учун маҳаллай мураббий эмас, айнан чет элдан мутахассис? Билишимча, Жаҳон чемпионатидаги асосий мақсад нафақат қатнашиш, балки, гуруҳдан чиқиш ва ўзини кўрсатиш вазифаси қўйилган. Ўзбекситон спорти раҳбарияти маҳаллий мураббий орқали буни амалга оширишнинг имкони йўқ, деб ўйлаяпти. Шунинг учун, чет элдан мураббий олиб келишмоқчи ва олиб келишяпти ҳам. 

- Бенто Осиёда ишлаган. Кимдир БАА терма жамоасида муваффақиятсиз ишлаган дейиши мумкин. Бироқ бизнинг футболчиларимизнинг савияси БАА терма жамоаси аъзоларидан баланд. Жанубий Кореяда эса у ёмон ишлагани йўқ. Гарчи, 2022 йилдаги Мундиалда Ганадан мағлуб бўлганига қарамай, қийин гуруҳдан (Гана, Португалия, Уругвай) чиқиш вазифасини уддалаган. Осиё терма жамоаларининг гуруҳдан чиқишининг ўзи осон эмас, биласиз. 

- Ҳаттоки корейс танишларим ва дўстларим Бенто термадан кетишидан афсусланган. Асосий берилаётган савол шундан иборат: Нима учун Кападзени қолдирмасдан Бентони олиб келяпмиз? Сабаби, раҳбариятимиз чет эллик тажрибали мураббийга ишонишмоқда. Номзодлар рўйхатига қарасангиз, Мундиалларда ва катта турнирларда натижа кўрсатган ёши катта мураббийларни кўрасиз. Кападзега келсак, у Олимпиадага жамоамизни ўзи олиб чиққан бўлса ҳам, тажрибаси йўқлиги учун ўша турнирда натижа кўрсата олмаган, деб ўйлаяпти кўпчилик. Бироқ нима бўлса ҳам Кападзе терма жамоамизда қолиши керак. Иккинчи мураббий ёки бошқа бирор лавозимда бўлса ҳам. Сабаби, келадиган хорижлик мураббий бизнинг футболимизни билмайди. 

- Бундан ташқари, Бентонинг шартномаси неча йиллик бўлади? Фақат Жаҳон чемпионати учунми ёки кейинги Мундиалгачами? Сабаби, ЖЧдан ярим йил ўтиб Осиё кубоги бор. Бу турнирга термамизни ким олиб боради? Футбол ассоциацияда аниқ режа борми? Режа фақат Жаҳон чемпионати учунгина тузилганми? Ҳалигача бунинг жавобини эшитмадим. Балки яқин кунларда билиб олармиз.