Ана холос! Месси асли бразилиялик бўлиб чиқди

Аргентина терма жамоаси сардори Лионель Мессининг асл насаби борасида кутилмаган маълумотлар очиқланди. Globo нашри ёзишига кўра, италиялик тарихчи Фьоренцо Сантини футболчи оиласининг шажарасини уч йилдан ортиқ вақт ўрганиб, унинг бразилиялик илдизларини аниқлаган.

Тадқиқотга кўра, Мессининг она томонидан боболаридан бири — Федерико Куччиттини — 1904 йил 27 январь куни Бразилиянинг Сан-Паулу штатида жойлашган Рибейран-Прету шаҳрида туғилган. Унинг ота-онаси, италиялик Раньеро Коччеттини ва Роза Риккецца, 1899 йили Washington номли кема орқали Бразилияга етиб келган ва Сан-Паулу штати қишлоқ ҳудудида ферма хўжаликларида ишлаб яшаган.

Сантинининг таъкидлашича, айнан Бразилияда оиланинг фамилиясидаги ўзгаришлар юз берган. Ҳужжатлар расмийлаштириш жараёнида Ардериго Коччеттини исми Федерикога ўзгартирилган, Coccettini фамилияси эса Cuccittini кўринишида қайд этилган. Кейинчалик айнан шу фамилияни Мессининг онаси — Селия Мария Куччиттини ҳам кўтариб юрган.

Федерико туғилганидан бир йил ўтиб, оила Бразилияни тарк этиб, Аргентинадаги Росарио шаҳрига кўчиб ўтган. Шу ерда кейинчалик футболчининг бобоси Антонио Куччиттини, ордан йиллар ўтиб эса Лионель Месси дунёга келган.

Сантини маълум қилишича, у Месси оиласининг келиб чиқишини ўрганишни аргентиналик футболчи «Барселона» таркибида янги-янги порлаб чиққани пайтларда бошлаган. Асосий изланишлар 2019–2022 йилларда амалга оширилган ва натижада Мессининг она томонидан шажараси тўлиқ тикланган. Тарихчининг айтишича, Италияда деярли учрамайдиган, ноодатий Cuccittini фамилияси айнан Месси оиласини Бразилия билан боғлашга ёрдам берган.

Шу билан бирга, ҳозирги кунда Мессининг қариндошлари Бразилияда яшамаслиги қайд этилган. Оила 1905 йилнинг ўзидаёқ мамлакатни тарк этиб, бутунлай Аргентинага кўчиб ўтган.