Анчелотти истеъфога чиқарилди

Бразилиянинг "Ботафого" клуби матбуот хизмати Давиде Анчелотти жамоа бош мураббийи лавозимидан кетганини маълум қилди.

Давиде — "пентакампеонлар" терма жамоаси бош мураббийи Карло Анчелоттининг ўғли. У аввал отасига ёрдамчи сифатида Мадриднинг "Реал" клубида ҳамда бошқа жамоаларда ишлаган.

Глобо нашрининг хабар беришича, клуб билан шартноманинг бекор қилинишига италиялик мутахассиснинг жисмоний тайёргарлик бўйича мураббий Лука Герранинг ишдан бўшатилишига нисбатан норозилиги сабаб бўлган. Жамоада мушак жароҳатлари кўпайиб кетгани ортидан ушбу қарор қабул қилинган.

Анчелотти клуб раҳбариятига бутун мураббийлар штаби сақлаб қолинган тақдирдагина ишни давом эттиришини билдирган. Аммо "Ботафого" раҳбарияти бу шартни қабул қилмаган. Натижада италиялик мутахассис клубни тарк этди.

Маълумот учун, унинг қўл остида жамоа 14 та ғалаба, 11 та дуранг ва 7 та мағлубият қайд этган.