"Андижон" ҳазиллашмаяпти...

Суперлиганинг 3-турида “Андижон” Тошкентда “Сурхон” клубига қарши майдонга тушди. Олдиндан мазкур қарама-қаршиликнинг анча қизиқарли ва шиддатли ўтиши кутилганди ва амалда ҳам шундай бўлиб чиқди.

Таъкидлаш жоизки, учрашув Александр Хомяков жамоаси учун яхши бошланди ва назорат ҳам “Бургутлар” тарафида бўлди. Учрашув бошланганидан буён “Андижон” жамоасида бироз устунлик борлиги сезилиб турганди ва бу хавфли вазиятлар орқали ҳам кўзга ташланди.

Масалан, Лука Згурскийнинг боши билан йўллаган зарбаси хавфли чиқди. Кейин эса Фарҳод Соҳибжоновнинг бир ўзи рақибларини алдаб “Сурхон” жарима майдони ичига кириб бориб йўллаган зарбасини дарвозабон бартараф этди. 36-дақиқада тиниб-тинчимас Соҳибжонов пенальти ишлади. Уни рақиб жарима майдони ичида йиқитишди ва бош ҳакам иккиланмасдан 11  метрли жарима белгисини кўрсатди. Бу вазифани Шерзод Эсанов бехато амалга оширди.

Иккинчи бўлим янада қизиқарли кечди ва голлар ҳам кўпроқ бўлди. 50-дақиқада энди Фарҳод Соҳибжоновнинг ўзи гол уришга муваффақ бўлди. У стандарт вазиятдан кейин тўпни дарвозага аниқ жойлаб қўйди. Тан олиш керак, шу куни Фарҳод учрашувни жуда фаол ва кўтаринки руҳда ўтказди. 73-дақиқа ўтиб бораётганида “Бургутлар” ҳисобни йириклаштиришди. Қанотдан узатилган пасни Шахром Самиев билан тўп учун курашда “Сурхон” ҳимоячиси ўз дарвозасига киритиб юборди.

Ҳисоб 0:3 кўринишига келгач, деярли барчада “Андижон”нинг ғалабасига шубҳа қолмаганди. Лекин футбол 90 дақиқа давом этишини амалда исботини кўрдик. Чунки “Сурхон” футболчилари 82 ва 90+4-дақиқаларда гол уришиб, интригани янада кучайтирдилар. Лекин “Андижон” барибир ғалабани сақлаб қолган ҳолда ўз ҳисобига навбатдаги уч очкони ёздириб қўйди.

Учрашув якунлангач, “Сурхон” ва “Андижон” футболчилари – Егор Кримец ҳамда Шахром Самиев бироз қизишиб кетишгани сабабли ҳакам уларга қизил карточка кўрсатди. Шу тариқа, “Андижон” “Сурхон”ни сафарда мағлубиятга учратишнинг уддасидан чиқди. Охирги бор 2003 йилда андижонликлар ушбу рақиби майдонида ғалаба қозонишганди. Хомяков жамоаси бирин-кетин қора анъаналарга чек қўймоқда. Ўтган турда “Бунёдкор”ни ўз майдонида 5:1 ҳисобида мағлуб этди. Бунгача “Бургутлар” ушбу рақибини енгга олмаганди. Бу сафар эса Тошкентда “Сурхон”ни ниҳоят енгишга эришди. Кўринишидан "Андижон" ҳазиллашмаяпти!

“Андижон” навбатдаги ўйинини энди 30 март санасида ўтказади. Шу куни “Бобур Арена”да “Насаф”ни қабул қилади.

“Сурхон” – “Андижон” – 2:3 (0:1).

16 март. Тошкент. “Пахтакор” марказий стадиони. 968 томошабин.

Ҳакамлар: Аскер Нажафалиев, Шохруҳ Мақсудов, Адхамжон Рихсибоев

Захира ҳаками: Никита Мустафин.

VAR: Рустам Лутфуллин

AVAR: Андрей Цапенко

“Сурхон”: Дилшод Йўлдошев, Суннатилло Хамиджонов, Азиз Пирмуҳаммадов (Беҳруз Шайдулов, 85), Достон Турсунов, Дмитрий Плетнев (Хумоюн Шербўтаев, 72), Диёр Рамазонов, Асад Каримов (Муҳаммадали Абдураҳмонов, 56), Шохжаҳон Султонмуродов (Егор Кримец, 56), Асилбек Жумаев (Сардор Маҳмудов, 72), Жаҳонгир Абдусаломов, Улуғбек Ҳошимов.

“Андижон”: Игорь Литовка, Абдувоҳид Ғуломов, Владимир Бубанья, Ислом Маматказин, Сардор Азимов, Фарҳод Бекмуратов (Леван Арвеладзе, 46), Муҳаммадкарим Тоиров (Илҳом Абдуғаниев, 46), Шерзод Эсанов, Фарҳод Соҳибжонов (Армин Бошняк, 69), Бектемир Абдуманнонов (Демир Имери, 81), Лука Згурский (Шахром Самиев, 62).

Голлар: Шерзод Эсанов, 36-пен. – 0:1. Фарҳод Соҳибжонов, 50 – 0:2. Азиз Пирмуҳаммадов, 73-авт – 0:3. Муҳаммадали Абдураҳмонов, 82 – 1:3. Хумоюн Шербўтаев, 90+4 – 2:3.

Огоҳлантиришлар: Жаҳонгир Абдусаломов, 10. Улуғбек Ҳошимов, 16 – Муҳаммадкарим Тоиров, 26. Фарҳод Бекмуратов, 44. Фарҳод Соҳибжонов, 55. Шахром Самиев, 75. Ислом Маматказин, 90+3.

Четлатишлар: Егор Кримец – Шахром Самиев (иккаласи ўйиндан кейин).