"Андижон"ни Ўзбекистондаги бошқа клубга алмаштирмоқчи эмас! Унга хориждан таклифлар бор, легионерга айланиш ниятида

Бу йил “Андижон” таркибига назар ташласангиз, салоҳияти юқори иқтидор эгалари талайгина. Айниқса, кўпчиликнинг эътиборига тушиб улгурган Дониёр Абдуманнопов ҳақида кўпчиликдан илиқ фикрларни эшитиб келяпмиз.

Ҳатто, бу борада ўзимиздан ҳам бир қатор Суперлига клубларининг устозлари қизиқиб сўраган. Унинг тезкорлиги, яхши дриблингга эгалиги, ҳужумларни уюштиришда фаоллиги мухлисларга ёқади. Шу боис, иложи борича унинг иқтидоридан максимал даражада фойдаланиб қолиш лозим.

Шуниси аниқки, Абдуманноповни олдинда катта мақсадлар кутмоқда. Мавсум бошида унинг клубда қолиши бироз жумбоқ бўлиб турганди. Якунда футболчи клубда қолишга қарор қилди. Унинг ўзи ҳам андижонлик бўлгани сабабли бошқа жамоага кетгиси келмади, чоғи.

“Ҳужумларни яхши якунлай олсак, ҳаммаси жойига тушади”

Ҳозирги пайтда у клубда муҳим ўйинчилардан бирига айланди. Лекин “Андижон” мавсумни кўнгилдагидек бошлай олмади. Бунга нима сабаб? Абдуманнопов дастлаб шу ҳақида ўз фикрини билдирди.

- Ўйинимизни топишда бироз қийинчиликлар бўлаётганини тан олишимиз керак. Аммо шуни ҳам айтишим керакки, бундай ҳолат мавсум бошларида ҳар бир жамоада рўй беради. Фақат “Андижон”да бу бироз чўзилиб кетди. Менинг фикримча, ҳужумларни яхши якунлай олсак, ҳаммаси жойида бўлади.

“Андижон” лигада жон сақлаб қолиш учун курашмайди”

Эътибор берган бўлсангиз, раҳбарият томонидан жамоага барча шароитлар яратиляпти. Катта-катта ваъдалар бериляпти, албатта вазифа бажарилса! Лекин мағлубиятлардан сўнг, ишқибозлар орасида хавотирга тушиб қолганлари ҳам талайгина. Суперлигада қолса ҳам катта гап, деган фикрларни билдираётганлар кўпайиб боряпти. Бу масалада Дониёрнинг муносабати қандай?

- Ҳа, раҳбарият томонидан аниқ ва жиддий ваъдалар берилгани рост. Тўғри, чемпионатни ўзимиз истагандек бошлай олмагандирмиз, лекин “Андижон” лигада жон сақлаб қолиш учун курашмайди. Худо хоҳласа, ўйинимизни яхшилаб боряпмиз. Шунга яраша натижа ҳам албатта ижобий тарафга ўзгаради.

“Футболда ўз имзоим бўлиши учун 33-рақамни танлаганман”

Шунингдек, андижонлик ушбу қанот ярим ҳимоячиси доимий равишда 33-рақам остида тўп суриб келади. Қизиқ, бунинг қандай сири ёки моҳияти бор? Шу хусусида унинг ўзидан қизиқиб сўраганимизда, ўзига хос жавоб қайтарди.

- 33-рақамни танлашимдан мақсад футболда ўз имзомга эга бўлишни хоҳлайман. Шунинг учун бу рақамни танладим. Тўғриси, 33-рақам остида эсда қоларли машҳур футболчи йўқ. Балки Худо қодир қилса, ана шу мен бўларман!

“Андижон”да қолганим ўзим учун ҳам фойдали эди”

Юқорида тўхталиб ўтганимиздек, Абдуманноповга мавсум аввалида таклифлар етарлича эди. Унинг “Андижон”дан кетиши ҳақида ҳам гап-сўзлар чиққани рост. Албатта, якунда футболчининг жамоада қолгани ишқибозларни хурсанд қилди. Ярим ҳимоячи клубда қолишига нима сабаб бўлганини айтди.

- “Андижон” жамоасида қолишимга, аввало, устозим – Отабек Ғуломхўжаев сабаб бўлган. Бундан ташқари, шу ерда тўп суриб, ўйинимни кучайтириб олишим керак, деб ўйлайман. Бошқа клубга кетсам, менинг у ердагилар билан тушуниб кетишим ва муҳитига кўникиб олишим учун ҳам вақт талаб қилинарди. Яхшиси, “Андижон”да қолганим ўзим учун ҳам фойдали эди.

“Четдан яхшироқ таклиф бўлса, кетишга ҳаракат қиламан”

Яна бир гап: Дониёр Абдуманноповга четдан таклифлар бўлаётгани хусусида ҳам эшитиб турибмиз. Катта эҳтимол билан у кейинчалик фаолиятини легионер сифатида давом эттирса ажаб эмас. Қолаверса, Дониёр қайсидир агентлик компанияси билан шартнома туздими? Айнан қайси мамлакатлардан унга қизиқишлар бор? Футболчи шулар ҳақида ҳам гапирди.

- Менинг мақсадим кучли чемпионатда тўп суриш. Ҳа, олдимда хориж жамоаларидан таклифлар бор. Аммо мен ҳали бир тўхтамга келганим йўқ. Қачонки, бу ҳақида қарор қабул қилсам, шунда маълум қиламан. Ҳозир бир нарса дейишим қийин. Имкон қадар четдан яхшироқ таклиф бўлса, кетишга ҳаракат қиламан. “Андижон” жамоасини Ўзбекистондаги бошқа клубга алмаштирмасам керак. Агентлик билан ҳали шартнома имзолаганимча йўқ. Гапнинг очиғи, агентлар билан музокара ўтказиб, кейин бир тўхтамга келамиз. Ҳозирда фақат оилам билан маслаҳат қилиб, ўзим қарор қабул қиламан.