"Андижон"нинг қишки режалари қандай?

«Андижон» жамоаси Янгиердаги қишки йиғинини давом эттирмоқда. Доимгидек мухлисларни клубда юз бераётган ўзгаришлар қизиқтириши аниқ. Бу борада гап кетар экан, дарҳақиқат «Андижон» таркибида ҳам аста-секин ўзгаришлар кузатилмоқда. Бош мураббий Александр Хомяков таркибни имкон қадар кучайтириш зарурлигини яхши тушуниб турибди. Чунки Суперлигада муносиб иштирок этиш учун таркиб ҳам шунга яраша бўлиши керак.

Ҳозирда бир қатор футболчилар билан музокаралар олиб бориляпти. Таркибга эса айрим янги ўйинчилар ҳам қўшилишган. Олдин хабар бериб ўтганимиздек, уларнинг орасида молдавиялик ҳужумчи Артём Литвяков ҳам бор. 1996 йили туғилган 24 ёшли футболчи ўтган мавсумни Молдавиянинг «А» дивизиони иштирокчиси «Тигина» клуби сафида ўтказган. Таққослаш учун айтишимиз мумкинки, Молдавия «А» дивизиони бизнинг про-лигамиз кабидир. Литвяков эса клуби билан чемпионатда 4-ўринни эгаллади ва 30 та гол уриб тўпурарган айланди. Ҳозирда ушбу ҳужумчи кўрикда бўлиб турибди. Бундан ташқари, яна бошқа легионерларнинг ҳам «Андижон» сафига қўшилиши кутилмоқда. Бунгача жамоа таркибига тожикистонлик Ойбек Абдуғаффоров қўшилганлигини эслатиб ўтиш жоиз. Шунингдек, ўзимизнинг бошқа жамоалардан ҳам ўйинчилар жалб этилган. Масалан, Фарғонанинг «Истиқлол» жамоасидан Рустам Абдулҳамидов кўрикдан ўтмоқда. «Сўғдиёна»дан эса ярим ҳимоячилар – Сирож Мелиев, Иззат Абдуллаев ва Муҳаммад Йўлдошев ҳам таклиф этилган.

Янгиердаги йиғин чоғида андижонликлар дастлабки назорат учрашувини ҳам ўтказишди. Про-лига вакили «Шердор»га қарши бўлиб ўтган ўйинда «Андижон» 4:0 ҳисобида ғалаба қозонди.

Таркиб билан танишинг: Арслон Аҳроров, Усмонали Исмоналиев, Рустам Абдулҳамидов,  Ойбек Абдуғаффоров, Фарҳод Мираҳматов, Артур Маматказин, Дониёр Исмоилов, Муҳаммадазиз Иброҳимов, Валилилло Тошхўжаев,  Фарҳод Бекмуродов, Артём Литвяков.

Захирадан майдонга тушганлар: Дониёр Абдуманнопов, Роббимжон Ҳасанов, Сирож Мелиев, Муҳаммад Йўлдошев, Мирзоҳид Маматхонов, Хушнуд Авилов, Сардор Азимов, Асилбек Азизов, Қаҳрамон Баҳодиров, Даврон Исоқов, Бахтиёр Қосимов, Абдуллоҳ Олимов, Дилмурод Абдуқаҳҳоров.

Молдавиялик легионер Артём Литвяков ҳамда захирадан майдонга тушган Абдуллоҳ Олимов иккитадан гол уришди. Ҳозирда мураббийларни дарвозабон масаласи ҳам ўйлантирмоқда. Чунки ўтган йилги посбонлар – Виталий Мирний, Руслан Матниёзов ва Акмал Ортиқов жамоа билан хайрлашишган. Айни пайтда «Локомотив»дан ёш посбон Арслон Аҳроров синовдан ўтказилмоқда. Мураббийлар эса клубга янги дарвозабон ҳам таклиф этиш борасида изланишлар олиб боришмоқда. «Андижон»нинг ўтган мавсумдаги сардори Бобур Акбаров «Қўқон-1912» машғулотларига қўшилган. Кўриб турганингиздек, деярли барча чизиқлар учун янги ижрочилар керак бўлмоқда. «Андижон» навбатдаги ўртоқлик учрашувини 15 январь куни Тожикистон клубларидан бирига қарши ўтказиши ҳам кўзда тутилган. Шундан сўнг 18 январда Тошкентда «Қўқон-1912»га қарши майдонга тушиши ҳам режалаштирилган. Кейин жамоа аъзоларига икки кунлик дам берилади. Сўнгра футболчилар пойтахтда тиббий кўрикдан ўтадилар. Режа бўйича 25 январда Фарғонадаги «Ҳоким Кубоги»да қатнашиши ҳам кўзда тутилган.

Фикрлар

Фикр қолдириш учун авторизациядан ўтинг!