Ads

Мавсумни кўнгилдагидек бошлай олмаган «Андижон» жамоаси биринчи даврада кўп очколарни йўқотди. Лекин иккинчи даврани улар катта иштиёқ билан бошлаганликлари кўриниб турибди. Айниқса, россиялик Александр Хомяков бош мураббий бўлиб келганидан кейин жамоа ўйинида ўзгаришлар аста-секин кўзга ташланиб бормоқда. Натижада улар иккинчи давранинг дастлабки учта турида етти очкони қўлга киритишди. Бу эса чиндан ҳам «Андижон»нинг ўйини ижобий томонга ўзгарганини кўрсатиб турибди.

Масалан, 16-турда Бекободда «Металлург» устидан ғалаба қозонишини ҳам кўпчилик кутмаганди. Лекин андижонликлар бунинг уддасидан чиқишди. Шуни айтиш керакки, ушбу мавсумда иқтидорли ҳужумчи Шаҳзод Убайдуллаев ўзидан яхши таассурот қолдиряпти. У «Металлург»га қарши кечган баҳсда жамоасининг дастлабки голига муаллифлик қилди. Умуман олганда, ушбу ўйинчи ҳозиргача чемпионатда бешта гол урди, Кубок баҳсларида эса учта голнинг муаллифига айланди. Наманганлик футболчи 2016 йили «Машъал» аъзосига айланганди. 2017 йилда эса биринчи лигада тўпурар бўлди. Бу йил эса «Андижон» шарафини ҳимоя қилмоқда. Шуни алоҳида айтиш керакки, Убайдуллаев илк бор Суперлигада тўп сурмоқда. Тўпурарлик салоҳиятини кўрсатаётган ҳужумчини бемалол андижонликларнинг янги «топилмаси» сифатида баҳолашимиз мумкин. Футболчи билан мулоқотимизда аввало «Металлург»га қарши ўйин ҳақидаги таассуротлари билан ўртоқлашди.

- Биз Бекободдаги учрашувда майдонга яхши кайфиятда тушгандик. Ўша куни ютмасак бўлмасди. Бунинг учун бош мураббий Александр Хомяков футболчиларни ўйинга ҳар томонлама пухта тайёрлай олганди. У ўйинчиларга яхши далда бера олди ва руҳлантириш учун керакли сўзларни ишлатди. Ўз навбатида жамоа аъзолари ҳам «Андижон» ва унинг мухлислари учун ўйнади. Қисқаси, биз «Металлург» билан баҳсга руҳан тайёр эдик. Бундан олдин АГМКга қарши ўйинда ҳам ғалаба қозонишимизга жуда яқин келгандик. Аммо 0:2 ҳисобида олдинда бораётиб якунда ўйин 2:2 билан тугаганди. Шунинг учун «Металлург»га қарши баҳсга биз янада жиддий тайёргарлик кўрдик, - дейди ҳужумчи.

Юқорида айтганимиздек, «Андижон» иккинчи даврани яхши бошлади ва ҳозиргача чемпионатда иккита ғалаба билан битта дурангни ўз ҳисобига ёзиб қўйди. Эътиборлиси, улар ҳар бир турда иккитадан гол урмоқда. Бу эса «Андижон»нинг ҳужумкор ўйин кўрсатаётганини кўрсатиб турибди. Бу ҳақида Шаҳзод шундай жавоб қайтарди.

- Иккинчи даврада жамоамизга янги ўйинчилар келишди. Масалан, Сардор Азимовни айтишим мумкин. У бизнинг ҳужум чизиғимизни кучайтира олди. Бундан ташқари, ҳужум чизиғида ўйнайдиган яна бир футболчи Даврон Исоқов олиб келинди. У ҳам жамоамизга ёрдам беряпти. «Металлург»га қарши учрашувда захирадан майдонга тушиб гол урди. Йигитлар ҳам иккинчи даврага бошқача тарзда тайёрланишди. Александр Андреевич ҳам доим футболчиларга яхши далда бера олади. Уни кучли руҳшунос деб айтган бўлардим. У ёзда жамоани жисмоний томондан янада яхшироқ тайёрлай олди. Билсангиз, биринчи даврада жамоамиз чарчаб қолаётганди ва ўйиннинг охиригача кучи етмай қолаётганди. Энди бўлса, барча футболчиларнинг 90 дақиқадан бемалол ўйнашга кучлари етяпти. У футболчиларни иккинчи даврага ҳар тарафлама яхши тайёрлай олди.

шахзод

Суперлигада биринчи марта тўп сураётганига қарамай, Убайдуллаев ўзининг сермаҳсуллигини кўрсатаётгани ҳам эътиборга молик. Шу билан бирга у «Андижон»нинг асосий таркибидан жой олиб, ўзини кўрсатишда давом этяпти.

- Биласизми, «Андижон»га келганимдан кейин ўзим учун Суперлигада ўйнаш осонроқ деб билдим, - дея гапини давом эттирди, Убайдуллаев. - Про-лигада эса асосан югур-югур ва бунинг учун сиз жисмонан анча бақувват бўлишингиз керак. Суперлигада эса ҳаммаси бошқача. Позицион ва техник-тактикага асосланган ўйин кўрсатишади. Бу эса мен учун ҳам анча қулай кўриняпти. «Андижон» таркибида биринчи марта чемпионатнинг илк турида сафарда «Қизиқлум»га қарши ўйнагандим. Ўшанда майдонга тушаётганимда ўзимга нисбатан ишончни ҳис қилгандим. Шунинг учун голлар уриб жамоамга ёрдам бера олишимга ишонгандим. Бошида захирадан майдонга тушдим ва кейинчалик аста-секинлик билан асосий таркибга кириб бордим. Ҳа, Суперлигада биринчи марта ўйнаяпман ва бу мен учун дебют мавсумим ҳисобланади. Ўша «Қизилқум»га қарши учрашувдан кейин ҳам айтгандим, ўзимда ҳеч қандай қўрқувни ҳис қилмаяпман.

Ушбу футболчи икки йил олдин биринчи лигада тўпурар ҳам бўлганди. Кейин эса у «Машъал»нинг асосий жамоасига қабул қилинди. Футболчи ўша пайтлардаги вазиятларни ҳам эслади.

- Ҳа, 2017 йили «Машъал» таркибида биринчи лига тўпурари бўлгандим. Ўшанда менга олий лигадан таклифлар бўлганди. Етакчи жамоалар менга қизиқиш билдиришганди. Лекин ўшанда «Машъал» раҳбарлари билан келиша олишмаганди. Шундан сўнг яна клубда қолдим ва сўнг Александр Хомяков бошчилигида биз тайёр эдик. Суперлигага мос жамоани тузганди. Балки бошида мураббийнинг тактикасига мослашишимда бироз қийинчилик сезган бўлишим мумкин. Лекин мана бу йил яна ушбу мураббий билан ишлаш насиб қилди. Энди бемалол унинг услубларини ўзлаштира оляпман.

Хомяковнинг «Андижон»да иш бошлагани ҳам унга ижобий таъсир кўрсатгани кўриниб турибди. Чунки Шаҳзод мураббий келганидан сўнг киритаётган голлари сони ортиб бормоқда.

- Хомяковнинг келгани менга бошқача таъсир қилгани рост. У қандай вазиятда нима йўл тутишни билади. Шунингдек, футболчиларни ўйинга тайёрлашга ҳам уста. Насиб қилса, бу мавсумда камида 10 та гол уришни мақсад қилганман, - дейди «Андижон» ҳужумчиси.

Энди навбатдаги турда мухлисларни водий дербиси доирасида «Андижон» - «Навбаҳор» ўртасидаги ўта муҳим ўйин кутиб турибди. Наманганлик футболчи эса мазкур баҳс олдидан шундай деди:

- Андижонда мухлислар футболни ҳаддан ортиқ севишади. Уларнинг қўллаб-қувватлаши ҳам бизга катта куч беряпти. Биз ҳам бундан руҳлаган ҳолда ўйнаяпмиз. Ҳар қандай футболчига бундай юқори муҳитда ўйнаш жуда ёқади. Олдимизда эса «Навбаҳор»га қарши водий дербиси учрашуви турибди. Биз ушбу баҳсга қаттиқ тайёргарлик кўряпмиз. Ўша ўйинда ҳам ғалабамиз билан мухлисларимизни хурсанд қилмоқчимиз.

 

Фикрлар

Фикр қолдириш учун авторизациядан ўтинг!
Behzod Aliev
17/08/2019 07:56
Андижон биз сен билан
ELECTRIC LIGHTER
16/08/2019 23:50
maladdddes
&
Стас Михайлов
16/08/2019 21:09
Шахзод давай Андижон сен билан