Англия суперклуби тезкор ҳимоячини ушлаб қола олмаяпти

Лондоннинг “Тоттенхэм” клуби Нидерландия терма жамоаси марказий ҳимоячиси Микки ван де Вен билан янги шартнома бўйича музокараларда қийинчиликларга дуч келмоқда.

Fichajes маълумотига кўра, клуб асосий футболчиларидан бирини сақлаб қолиш учун у билан узоқ муддатли шартнома имзолашни мақсад қилган. Бироқ музокаралар амалда тўхтаб қолди. “Шпорлар” раҳбарияти ҳозирча футболчини янги келишувга кўндира олмаяпти.

Англия Премьер-лигасининг энг тезкор ҳимоячиларидан ҳисобланган 24 ёшли Микки ван де Веннинг клуб билан амалдаги шартномаси 2029 йилнинг ёзигача давом этиши белгиланган. Аммо томонлар шартларни яхшилаш бўйича ҳали бир тўхтамга кела олмади.

Музокаралар секинлашувига клубнинг турнир жадвалидаги оғир аҳволи сабаб бўлаётгани айтилмоқда. Ван де Вен жамоада барқарор ўйин кўрсатаётган кам сонли футболчилардан бири ҳисобланади. Бироқ АПЛда 16-ўринда турган “Тоттенхэм” натижалари музокараларга таъсир қилган.

Шунингдек, нидерландиялик ҳимоячига “Ливерпуль” ва “Реал” каби йирик клублар қизиқиш билдираётгани ҳам лондонликлар учун футболчини сақлаб қолишни янада қийинлаштирмоқда.

Шунга қарамай, “Тоттенхэм” раҳбарияти ёзда музокараларни қайта бошлашга умид қилмоқда ва футболчини жамоа келажагининг муҳим қисми, деб ҳисоблайди.