Анталияда яна бир ўйин ёхуд "Бургутлар"нинг рақиби ҳақида нималарни биласиз?

 “Андижон” клуби 20 февраль куни яна бир ўртоқлик учрашувида майдонга тушади. Бу сафарги рақиб – Чехиянинг “Збройовка Брон” клубидир. Бугун мазкур рақиб ҳақида тўхталамиз.

Чехия клуби 1913 йилнинг 14 январь куни ташкил топган. “Збройовка Брон” Чехия халқ лигасида (бизнинг про лигамиз каби)да қатнашиб келяпти. Мавсумнинг биринчи қисмидан сўнг “Збройовка Брно” 16 та иштирокчи орасида 16 учрашувдан кейин 3 ғалаба, 6 дуранг ва 7 мағлубият қайд этиб, (тўплар нисбати 18\29) 15 очко билан мусобақа жадвалида 14-ўринда.

Клуб уй ўйинларини “Србска” номли стадионда ўтказади ва у 12550 нафар томошабинга мўлжалланган.

Жамоанинг энг қиммат футболчиси 21 ёшли ҳужумчи Тадеас Вахусек бўлиб, “Трансфермаркт”да унинг баҳоси 250 минг еврони кўрсатмоқда. Шунингдек, таркибда словакиялик, ганалик, бельгиялик, америкалик ва колумбиялик легионерлар бор.

Жамоага чехиялик 50 ёшли мутахассис Ярослав Хайнек бош мураббийлик қилиб келмоқда. У ушбу лавозимда 2014 йилнинг 1 июлидан бери ишлаяпти. Унинг бошчилигида жамоа ҳозирга қадар 19 та учрашувда 5 ғалаба, 6 дуранг ва 8 мағлубият қайд этди.

“Збройовка Брно” Анталия йиғини мобайнида бунгача Латвиянинг “Ауда” клубини 3:1 ҳисобида мағлуб этди. Кейинги учрашувда Даниянинг “Брабранд” жамоасини ҳам яна 3:1 натижаси билан мағлуб қилди. "Андижон" билан ўйин эса чехияликларнинг учинчи беллашувига айланади.

Шунингдек, бу андижонликларнинг Чехия клубига қарши илк ўйини эмас. Ёдингизда бўлса, 13 февраль санасида Чехия халқ лигаси (про лига) пешқадами “Злин” (0:2) жамоасига қарши майдонга тушишган. Навбатдаги баҳс эса "Бургутлар"нинг чехияликларга қарши иккинчи ўйинига айланади.

“Андижон” – “Збройовка Брно” учрашуви бугун, 20 февраль санасида Тошкент вақти билан соат 17:30 да (Анталия вақтига 15:30) бошланади.