Анталиядаги суҳбат. Умарали Раҳмоналиев: "Бу фақатгина бошланиши..."

Истеъдодли футболчимиз Умарали Раҳмоналиевнинг фаолиятида янги саҳифа очилганини биласиз. У “Рубин” клуби билан Туркиянинг Анталия шаҳрида ўтказилаётган тайёргарлик йиғинида қатнашмоқда.

Янги жамоасида ўзини яхши томонлама кўрсатаётгани ҳақида эшитяпмиз. Чунки бу футболчининг келажаги порлоқ. “Навбаҳор”га қарши ўртоқлик учрашувида Раҳмоналиев “Рубин” сафида илк голини ҳам урди.

Анталияда эканлигимиздан фойдаланиб, Умаралига айрим саволлар билан мурожаат қилдик.

- “Рубин” билан Туркиянинг Анталия шаҳридаги йиғинида иштирок этяпсиз. Янги жамоангизга мослашув қандай кечмоқда?

- Жамоам билан мослашув жараёни жуда аъло даражада кетяпти. Сабаби, клубдаги ишчи-ходимлардан тортиб мураббийлар, футболчилар барчаси бизни клубга мослашиб олишимиз учун ҳамма шарт-шароитларни яратиб беришди. Биздан фақат тезроқ мослашиб, жамоа ўйинига қўшилиб кетиш қолди ва бу жараён ҳам яхши ўтяпти. “Рубин”нинг мақсади нима эканлигини тушуниб етиш учун ҳамма шароит ва имкониятлар бор. Жамоадошларимиз ҳам машғулот ва ўртоқлик ўйинларида анча ёрдам беришяпти. Худди улар билан анчадан бери бирга ўйнаётгандек таассурот қолдиришяпти.

- “Навбаҳор”га қарши ўртоқлик учрашувида гол урдингиз ва жамоангиз 6:0 ҳисобида ғалаба қозонди. Бундай натижани ўйламаган бўлсангиз керак-а ёки “Навбаҳор” шунга яраша ўйин кўрсатдими?

- Ўйини ўхшамади. Шу қаторда бизга машғулот жараёнларида берилган барча юкламаларни қилишга ҳаракат қилдик ва бу ўз натижасини ҳисобда ҳам акс эттирди.

- “Рубин”да Рустам Ашурматов билан биргасиз. Четга, янги клубга илк бор борганингизда бундай пайтда ёнингизда ҳамюртингиз бўлиши қулай. Ашурматов бўлмаганида мослашишга ҳам қийналардим, деб ўйлайсизми?

- Ҳа, албатта, агар Рустам ака бўлмаганида менга қийинчилик бўларди. Ашурматов ўз тажрибаси, легионерликни яхши ҳис қилиши, чет клубларда ўйнаганлиги сабабли тажрибаси кўриниб турибди. Менга ҳар бир ишда, юриш-туришларда қўлидан келганича ёрдамини, акалик маслаҳатларини бериб келмоқда. Шу боис иккаламизда ҳам жамоага киришиб кетиш яхши кечяпти.

- Янги дўстлар ҳам орттиряпсиз. Шуни инобатга олганда, “Рубин”да қайси футболчилар билан яқин муносабат ўрнатяпсиз?

- Футболчиларни номма-ном санаб ўтадиган бўлсак нотўғри бўлади. Бу ерда ҳар бир ўйинчининг биз билан муносабати аъло даражада. Футбол ичида ҳам, уни ташқарисида ҳам барчаси яхши.

- Янги клубингизда сизни ёқимли маънода ҳайрон қолдираётган жиҳатлари ҳам кўзга ташланяптими?

- Жамоадаги ички муҳитга келсак, футболчилардан тортиб ишчи-ходимларгача ҳамманинг ўз ишига бўлган масъулияти менга ёқди.

- Бош мураббийнинг услубини ўзлаштиришингиз қандай кетяпти? У билан суҳбатда нимани хоҳлаётганини тушуниш қийин бўлмаяптими?

- Юрий Анварович жуда самимий инсон. Мендан нима хоҳлаётганлиги, қандай ўйин кутаётганлиги ҳақида суҳбатлашиб олдик. Суҳбатимиздан сўнг машғулот ва ўйин жараёнларида буни амалда синаш учун нимани истаётганини менга тушунтириб бормоқда.

- “Рубин” билан нималарга эришмоқчисиз?

- Олдимизга катта мақсадларни қўйганмиз. “Рубин” жамоаси билан чекланиб қолмасдан балки ўз устимизда янада ишлашда давом этиб, Худо хоҳласа бундан ҳам яхши клубларда, лигаларда тўп суриш ниятим бор. Бу йилги мақсадимиз шундайки, “Рубин” билан Россия премьер-лигасига қайтиб, у ерда ҳам жамоани нимага қодирлигини кўрсатмоқчимиз. Бу фақатгина бошланиши. Худо насиб қилса, бундан ҳам топ-лигаларда фаолиятимни давом эттириш ниятим бор.

Шуҳратбек Жўраев.