Анвар Бердиев: "Легионерларга эхтиёжим йўқ"

Про лига клублари ҳам астойдил ёзги йиғинни олиб бормоқдалар. Жумладан, Ғузорнинг “Шўртан” жамоаси ҳам мавсумнинг иккинчи қисмига тайёргарликни олиб бормоқда.

Бош мураббий Анвар Бердиев олдида маъсулиятли вазифа турибди ва у шунга монанд жиддий равишда ўз ишини олиб бормоқда. Sports.uz сайтига эса Бердиев жамоасининг тайёргарлиги ва режаси хусусида интервью берди.

- “Шўртан”нинг ёзги йиғини қандай режа асосида олиб бориляпти?

- “Қўқон-1912”га қарши ўйиндан кейин йигитлар таътилга чиқишганди. 10 июлдан ўз қароргоҳимизда йиғилдик. Тўрт даврали системада дастлабки икки давра якунига етганидан кейин яна ўз қароргоҳимизда шуғулланишни бошлаганмиз. Машғулотларимизни кунига икки маҳалдан олиб боряпмиз. Тайёргарлик жараёнида 4 та назорат ўйинини гаплашиб қўйганмиз. Илк учрашувимизни биринчи лига вакили “Қумқўрғон”га қарши ўтказдик. Кейингисини 18 июль куни “Насаф” U21 га қарши ўтказамиз. 24 июлда “Насаф”нинг асосий таркиби билан ўйнаймиз. 28-санада эса биринчи лиганинг яна бир жамоаси – “Қизириқ”га қарши майдонга тушамиз. Жамоамизда кўп янгилик бўлмайди. Айрим ўйинчилар сафимизда кўрикда бўлиб туришибди. Агар улар билан шартнома имзолайдиган бўлсак, эълон қиламиз. Биринчи ва иккинчи даврада ўйнаган футболчиларни барчаси “Шўртан”да қолишди. Биргина Абдуғани Камолов жамоамизни тарк этишни истаб, мен билан гаплашди. Ўзини бошқа клубда синаб кўрмоқчилигини айтди. Биз унга қаршилик қилмадик. Ҳар доим айтганман: футболчини жамоада ўйнагиси келмаса у билан ишлашни фойдаси йўқ. Иккаламиз учун тўғри йўл танланди, деб ўйлайман. U19 жамоасидан беш нафар ёш футболчини йиғинларга таклиф қилганмиз.

- Шогирдларингизга Суперлига клубларидан чорловлар бўляптими?

- Таклифлар бўлди. Футболчиларимиз билан гаплашиб олдик. Уларга алоҳида миннатдорчилик билдираман. Чунки “Шўртан” билан шартномамиз бор ва охиригача сиз билан бирга ишлаймиз деб мени хурсанд қилдилар. Ҳозирда имкониятимиз ёмон эмас. Лекин олдиндан катта гапиришни ёқтирмайман. Ҳар бир ўйинда фақат ғалаба учун майдонга тушамиз. Йил якунида ким қаерда бўлишини кўрамиз. Олдиндан ҳеч нимани ваъда бермаймиз. Аммо биз ҳар бир баҳсда астойдил курашамиз. Мухлисларимиз биз учун 12-ўйинчи сифатида катта далда бўлишяпти. Бунинг учун улардан миннатдормиз. Шунингдек, жамоамиз раҳбариятига, Шамил ака Ярулинга, Нурали Султоновга катта раҳмат. Улар барча шароитларни яратиб беришяпти. Тайёргарлик кўриш жараёнида бизда ҳеч қанақа камчилик йўқ. Қўлдан келганича майдонга чиқиб, уларнинг ҳам ишончини оқлашга ҳаракат қиламиз.

- Сир бўлмаса қайси футболчиларингизга Суперлига клублари қизиқишди?

- Буни айтсам тўғри бўлмайди. Ҳаммаси билан алоҳида гаплашиб олганмиз. 3-4 нафарига таклифлар бўлди. Ёққан томони, улар менга жамоада қолишга ва ёрдам беришга ваъда беришди.

- Биринчи даврадан ҳар томонлама қониқдингизми?

- Барибир жамоа ўзига келиб олиши учун озгина қийналди. Иккинчи даврада бироз ўзимизга келдик. Аниқ айта оламанки, футболчиларимиз бундан ҳам кўпига лойиқлар. Мавсумнинг иккинчи қисмида ҳам бўшашиш йўқ. Қайсидир жойларда муҳим очколарни бой бердик. Аммо битта нарса қувонтиряптики, ҳали ҳам имкониятимиз бор. Мавсум охиригача курашамиз. Қолгани Худодан.

- Бир қатор клублар таркибини легионерлар билан кучайтиришяпти. Сизга легионерлар керакми-йўқми?

- Яхши савол бердингиз. Асосий эътиборимни ўзимизни ўзбекистонлик футболчиларга қаратганман. Чунки яхши легионерни про лигада топиш қийин. Мендан хафа бўлишмасину, ҳатто Суперлигада ҳам саноқлилари ўз клубларига ёрдам беришяпти. Мен ундан кўра маҳаллий ўйинчиларимизга эътибор қаратаман. Легионерларга эхтиёжим йўқ.

Шуҳратбек Жўраев.