Анвар Бердиев: "Ўйин битта голгача бўлди"

Суперлиганинг 6-туридан ўрин олган “Шўртан” – “Машъал” (0:1) учрашувидан кейинги матбуот анжуманида ғузорликлар бош мураббийи Анвар Бердиев саволларга жавоб қайтарди.

- Ўйин ҳақида нима дейиш мумкин? Ўйин битта голгача бўлди. Иккала жамоа ҳам бир-бирига тенг эди. “Машъал” ўз вазиятидан фойдаланиб кетди. Футболчиларим эса имкониятдан фойдалана олишмади. “Машъал” жамоасини ғалаба билан табриклайман.

- Битта учрашувда 4 сариқ ва 1 та қизил карточка кўрсатилди. Жамоада тартиб-интизом борасида муаммолар борми?

- Тартиб-интизом бўйича ҳеч қанақа муаммо йўқ. Қизил карточка бўлган вазиятда ҳужумчи эҳтиросга берилди ва бундай ўйнамаслиги керак эди. Хоҳлаймизми-йўқми, ҳужумчида дарвозага зарба йўллаш иштиёқи кучлироқ бўлади. Балки ўша вазиятда ҳужумчимиз ўзини тута олмай қолди, деб ўйлайман.

- Сирожиддин Қўзиев таркибда кўринмади...

- Кўрган бўлсанглар, Қўзиев “Навбаҳор” билан учрашувда жароҳат олгач, ўйинни охиригача етказа олмаганди. Бундан ташқари, энг яхши ўйинчиларимиздан бири Шахзод Неъматжонов ҳам бизга ёрдам бера олмаяпти. Албатта, уларнинг ўрни билинди.