Анвар Ғофуров: "Рақиб захирадан тушган футболчилар орқали босимни кучайтиришга ҳаракат қилди"

Суперлиганинг 11-туридаги "Сурхон" - "Пахтакор" (1:1) учрашувидан кейин мезбонлар бош мураббийи Анвар Ғофуров матбуот анжуманида ўз фикрларини билдириб ўтди:

"Ассалому алайкум, бугун чемпионлик учун курашаётган, кучли таркиб ва аниқ ўйин услубига эга жамоага қарши майдонга тушдик. Учрашув қийин бўлишини олдиндан билган эдик ва шунга яраша тайёргарлик кўрдик. Ўйин 1:1 ҳисобида якунланди.

Биринчи бўлимда ҳисобни очганимиздан сўнг рақиб ўйин темпини оширди. Айниқса, захирадан тушган футболчилари орқали босимни кучайтиришга ҳаракат қилишди ва маълум даражада бунга эришишди. Бу албатта, уларнинг кучли таркиби ва шаклланган ўйин услубига эга эканидан далолат.

Иккинчи бўлимда рақиб етарлича вазиятлар яратди. Биз эса асосан қарши ҳужумлар орқали имкониятлардан фойдаланишга интилдик, аммо кўплаб ҳужумларимиз якунига етмади. Афсуски, ўйин сўнгида қўшиб берилган дақиқаларда бурчак зарбасидан гол ўтказиб юбордик. Аслида, айнан гол урган футболчига яқинроқ ўйнаш бўйича тавсиялар берилган эди — у захирадан тушган, кучга тўла ва бўйи баланд футболчи эди. Бироқ вазиятда эътибор етарли бўлмади.

Умуман олганда, ҳар икки жамоа ҳам охиригача курашди ва дуранг натижа қайд этилди. Бугун бизни қўллаб-қувватлаган барча мухлисларга алоҳида миннатдорчилик билдирамиз", - деди Ғофуров.