АПЛда чемпионлик тақдири сўнгги турда ҳал бўладими?

"Кўҳна қитъа"нинг бир қатор чемпионатларида чемпион номи маълум бўлиб улгурди. Бу борада АПЛ жамоалари ҳамон интиригани сақлаб туришибди. Бу эса Премьер-лиганинг шиддатли ва қизиқарли баҳслари олдиндалигининг яна бир исботидир.

Сўзимиз бошида чемпионлик тақдири сўнгги турда ҳал бўлиши мумкин деб айтиб ўтган эдик. Бунга бир нечта сабабларни келтириб ўтишимиз мумкин.

Биринчидан, 34-тур ортда қолди, аммо чемпионлик учун курашаётган асосий икки жамоалар: “Манчестер Сити” ва “Ливерпуль” орасидаги тафовут атига икки очкони ташкил этмоқда. Бир йил олдин чемпионат шу палласига келганида, АПЛда чемпион номи аниқ бўлиб улгурган эди. Айни дамда турнир жадвалини бошқараётган “Ливерпуль” жамоаси 85 очко тўплаган. “Шаҳарликлар”да эса 83 очко мавжуд. Тўғри, “Манчестер Сити”да битта ўйин захираси борлигини ҳам эсдан чиқармаслик керак.

Лекин, чемпионатнинг қолган тўрт ўйинида ва захирадаги бир ўйинида қайси жамоаларга қарши тушишини ҳам бир эслаб ўтайлик.  “Сити” очко йўқотиши мумкин бўлган жамоалар сони бисёр. “Шаҳарликлар” аввалига ўз уйида шу ҳафта ўзларини ЕЧЛдан чиқариб юборган "Тоттенхэм" клуби билан баҳс олиб борса, кейинчалик мухлислар Манчестер дербисига шоҳид бўлишади.

Маълумот учун, Манчестер дербиси 24 апрель куни "Олд Траффорд" стадионида бўлиб ўтади. Бу борада эса "Ливерпул"ни айтарли очко йўқотиши мумкин бўлмаган икки асосий рақиб кутиб турибди. Дастлаб 37-турда "Ньюкасл" меҳмони бўлса, сўнгги турда "Энфилд" да "Вулверхэмптон" клубини қабул қилади. Гарчи, бу икки клуб Гвардиола шогирдлари рақибларидан кучли бўлмасада, жамоаларга ҳурмат сақлаган ҳолда шуни айтиш керакки, бу футбол ва унда эса ҳамма нарса бўлиши мумкинлигини биз ўз кўзимиз билан деярли ҳар куни кўрмоқдамиз.

Дарвоқеа, “Манчестер Сити” жамоаси ҳам охирги мағлубиятини айнан ўз уйида яхши натижа қайд этадиган -  "Нюкасл" клубидан қабул қилиб олган эди.

Иккинчидан, халқаро майдонда унчалик омади келмаётган Гвардиола шогирдлари бу мавсум ҳисобидан мақташга арзирли соврин қўлга киритиши сўроқ остида қолмоқда.

"Шаҳарликлар" энди бор эътиборини АПЛга қаратиш кераклигини ҳаммамиз яхши билиб турибмиз. Албатта, Клопп ҳам. Мавсум якунига келиб деярли барча кубокларни қўлга киритишга яқин турган "Сити" бирданига икки асосий кубокдан мосуво бўлиб қолишқа яқин келди. Биринчиси қўлдан бой берилди ҳам (ЕЧЛ).

Трансферларга миллионларни сарф этаётган ва мавсум якунида клуб фақатгина Англия кубоги ва Англия лига кубоги билан чегараланиб қолиши ҳам мумкин.

“Манчестер Сити” жамоасини олдинда бир қатор қийин, аммо ғолиб чиқиши мумкин бўлган учрашувлари бор. Исботи ўлароқ сўнгги саккиз ўйинни олайлик (8та ғалаба, 21та гол урган ва 2та гол ўтказган).

Учинчидан, жамоалар шу даражада принципиалликни юзага келтиришдики, ҳатто АПЛ тўпурарлар пойгасида ҳам шу икки клуб футболчилари карвонбошилик қилиб боришмоқда (Муҳаммад Салоҳ 19та гол, Серхио Агуеро 19та гол).

Жамоалар посбонларига келадиган бўлсак. Бу борада ҳам мутлақ тенгликни кўришимиз мумкин. Бу мавсум қуруқ сериялар қайд этиш борасида “Ливерпуль” посбони Алиссон Беккер ва “Сити” дарвозабони Эдерсон ўз дарвозаси даҳлсизлигини сақлаган ўйинлар миқдори йигирматани ташкил этмоқда.

Жамоаларнинг ўзаро ўйинига келсак, Премер-лига ҳисобидан икки бор тўқнаш келган бўлса, клублар ҳар гал муроса йўлини танлашди. Балки, бу статистикалар ўз йўлигадир. Аммо, булар шунчаки, статистика эмас, бу жамоаларнинг кучлари тенг эканлигининг далилидир.

Ҳамма фактларни бир четга олиб шуни айтиш керакки, узоқ вақт чемпионлиги кутилаётган "Ливерпуль" бу мавсум чемпионликка лойиқ ўйин кўрсатиб келмоқда десак ҳеч муболаға қилмаган бўламиз.

Амалдаги чемпионлар эса, кубокни сақлаб қолишга ва улар ҳам бунга ҳақли эканини исботлашга ҳаракат қилишмоқда.

Демак, қайсидир жамоанинг сўнгги турда чемпион бўлиш эҳтимоли юқорироқ. Бу нарса эса бизга бир неча йил олдин бўлиб ўтган мавсумни ёдимизга олишга мажбур қилди.

Ўша мавсум давомида ҳам икки Манчестер жамоалари чемпионат сўнггига қадар шундай тенгликни юзага келтиришган эди. Якунда эса “шаҳарликлар” битта гол фарқи билан АПЛ чемпиони бўлган эди. Демак, АПЛда ҳали кураш тўхтагани йўқ.

Исмоил Йўлдошев