АҚШ мундиал ҳакамини мамлакатга киритмади

Жаҳон чемпионатида ҳакамлик қиладиган илк сомалилик бўлиши кутилган

«У футбол жамоатчилиги қўллаб-қувватлашига лойиқ»

Жаҳон чемпионатида ҳакам сифатида ишлаш орқали ўз мамлакати тарихида янги саҳифа очиши кутилган сомалилик рефери Омар Артан АҚШга киришга рухсат ололмагани ҳақида хабарлар тарқалди.

Маълумотларга кўра, Омар Артан ўтган дам олиш кунларида Майами халқаро аэропортида Америка Қўшма Штатларига киришига йўл қўйилмаган. Унинг қўлида амалдор саёҳат визаси бўлгани айтилмоқда.

Сомали ҳозирда Дональд Трамп маъмурияти жорий этган кенг қамровли саёҳат чекловлари қўлланилаётган бир нечта давлатлар қаторига киради. Артанга кириш нега рад этилгани расман изоҳланмаган бўлса-да, Сомали ҳукумати вакиллари бу қарорни "футболнинг ҳалол ўйин тамойилларига путур етказадиган ҳолат" сифатида баҳолади.

Сомалилик расмийлар футбол жамоатчилигини Артанни қўллаб-қувватлашга чақирди. "Омар Артан Африканинг энг ҳурматли реферилари орасида. У бутун футбол оламининг ёрдамига лойиқ", — деди Сомали Ёшлар ва спорт вазирлиги катта маслаҳатчиси ва миллий жамоанинг собиқ сардори Цийсе Аден Абшир Франс-Пресс агенлигигага юборган баёнотида.

"Уни Америка Қўшма Штатларига киритмаслик ва режалаштирилган учрашувларда ҳакамлик қилишга йўл қўймаслик нафақат шахсан унинг ўзига зарар етказади, балки футболда адолат, меҳнатга яраша баҳолаш ва ҳалол ўйин руҳига бўлган ишончни ҳам заифлаштиради", — дея қўшимча қилди у.

Маълумотларга кўра, Артан ҳозирги пайтда сўнгги ойларда фаолият юритиб келаётган Истанбулда қолмоқда.

Ўтган йили Африканинг энг яхши рефери деб топилган Артан 2023 йилги Африка Миллатлар кубогида учрашувларни бошқарган. У 2018 йилдан бери ФИФА рефери сифатида фаолият юритади. Жаҳон чемпионати олти ҳафталик марафонида ўтказилиши режалаштирилган рекорд 104 та ўйинда ишлайдиган 170 нафар ҳакам, ёрдамчи ҳакам ва видеоҳакамлар рўйхатига киритилган эди. Сомали президенти Ҳассан Шейх Моҳамуд уни "янги авлод сомалиликлари учун илҳом манбаи бўлган рамзий шахс" деб таърифлаган.

Саёҳат билан боғлиқ муаммолар бу йилги Жаҳон чемпионати учун олдиндан хавф омилларидан бири сифатида тилга олинаётган эди, айниқса, Трамп маъмуриятининг муҳоҷиратга нисбатан қаттиқ сиёсатини инобатга олганда. Артан АҚШга киришда қийинчиликка дуч келган сўнгги номзодлардан бири бўлди.

Бир неча ойдан бери Эрон терма жамоаси футболчилари ва расмийлари ҳам визалар масаласида муаммоларга учраётгани айтилмоқда. Оқибатда, жамоанинг машғулот базаси АҚШдан Мексикага кўчирилган.

Ҳафта бошида эронлик расмийлар ҳатто техник ходимлар ҳам сўнгги дақиқада визадан маҳрум этилганини маълум қилди. АҚШ Давлат департаменти бу иддаоларни рад этди. Шу билан бирга, Ироқ терма жамоаси ҳужумчиси Аймен Ҳусейн Чикагода жойлашган О’Ҳара аэропортида деярли етти соат давомида ушлаб турилиб, сўроқ қилингани хабар қилинди. Швейцария терма жамоаси ярим ҳимоячиси Бреел Эмболо ҳам ўтган ҳафтада АҚШ визосидан рад жавоб олган, аммо Швейцария расмийлари бу қарор устидан шикоят киритиб, унинг ижобий ҳал этилганини маълум қилди.