Арда Гюлер: Бу гапларга ишонманглар!

“Реал” ярим ҳимоячиси Арда Гюлер “Фенербаҳче”да у билан ишлаган мураббий Серхат Пекмежчи томонидан айтилган Мадриддаги жамоадошлари уни камситганлиги ҳақидаги гапларга муносабат билдирди.

- Карьерам бошида муҳим роль ўйнаган Серхат Пекмежчи жаноблари томонидан қилинган сўнгги оммавий баёнотларни қайғу билан кузатдим.

“Қироллик клуби”га келган биринчи кунимданоқ мени илиқ кутиб олишди ва мен ҳар доим бу клубни оилам, деб ҳисоблаганман. Мен “Реал” футболчиси эканимдан жуда фахрланаман ва бу эмблемани яна кўп йиллар ҳимоя қилишни истайман.

Бизда жуда кучли жамоа бор ва барча жамоадошларим билан бирга ўйнаш имкониятидан хурсандман ҳамда бундан ғурурланаман. Илтимос, бу масала бўйича ёзилган ёки айтилган ҳар қандай изоҳ ва хабарларга эътибор бермасликни сўрайман, - деб ёзди Гюлер ижтимоий тармоқдаги саҳифасида.

Таъкидлаш лозимки,аввалроқ Серхат Пекмежчи Арда Гюлернинг  Мадриддаги муаммолари ва ўзини ортиқча юқори баҳолайдиган жамоадошлари уни менсимаганлиги ҳақида гапирган эди.