Аргентина терма жамоаси дарвозабони Мартинес синган бармоқ билан "ЖЧ-2026"да ўйнаётганини айтди

Аргентина терма жамоаси ва «Астон Вилла» дарвозабони Эмилиано Мартинес жаҳон чемпионати — 2026 мусобақасида майдонга оғриққа қарамай тушаётганини маълум қилди. Унинг айтишича, мусобақа бошланишидан олдиноқ бармоғи синиб, шунга қарамасдан ўйнашга қарор қилган. 33 ёшли посбон 20 май куни «Астон Вилла» ва «Фрайбург» ўртасидаги Европа лигаси финали олдидан қизиш машқлари пайтида жароҳат олган. Ўша учрашувда англиялик клуб ғалаба қозонган эди.

«Ҳали ҳам оғриқ тўхтагани йўқ. Қўлим оғришини билардим, лекин жарроҳлик амалиётидан қочишга ҳаракат қилдим. Англияда, АҚШда ва бошқа бир қатор давлатларда қўл бўйича мутахассислар билан маслаҳатлашдим. Албатта, финалда синган бармоқ билан ғалаба қозонганингдан кейин сенга операция қилиш керак, жаҳон чемпионатидаги бутун гуруҳ босқичини ўтказиб юборишинг мумкин, дейишса… Буни эшитганимда, аввалига ҳатто Аргентина терма жамоаси билан тўлиқ машғулот ўта олмадим. Бошимда турли ўйлар айланарди. Менинг тайёргарлигим жамоадошларимникидан мутлақо фарқ қилди. Биринчи ўйиндан икки кун олдин ҳам ўзимни яхши ҳис қилмаганман», — дея Мартинес сўзларини келтиради The Sun нашри.