«Арсенал» 19 ёшли аргентиналикни кузатмоқда

«Бока Хуниорс»нинг ҳужумкор ярим ҳимоячиси Томас Арандага Лондоннинг «Арсенал» жамоаси жиддий қизиқиш билдирмоқда. Бу ҳақда футбол бўйича инсайдер журналист Экрем Конур хабар берди.

Манбага кўра, «Арсенал» Арандани Жанубий Америкадаги энг истиқболли ёш футболчилардан бири сифатида кўриб чиқмоқда. Лондон клуби унинг ўйинларини доимий кузатиб бормоқда. Аммо ҳозирча расмий таклиф юбориш борасида якуний қарор қабул қилмаган.

Хабарларга кўра, Аранданинг «Бока Хуниорс» билан амалдаги шартномасида 17,5 миллион евро миқдорида товон пули белгиланган. Шу билан бирга, 19 ёшли ярим ҳимоячига фақат «Арсенал» эмас, балки Серия А, Бундеслига ва Ла Лига клублари ҳам катта қизиқиш билдирмоқда.

2026 йилги мавсумда Аранда барча мусобақалар доирасида 22 ўйинда майдонга тушди, икки бор гол урди ва яна икки марта жамоадошларига голли пас берди.