"Арсенал" ҳужумчиси Мадридга кетади

Лондоннинг «Арсенал» жамоаси ҳужумчиси Габриэль Жезус ёзги трансфер ойнасида Испания чемпионатидаги етакчи клублардан бирига йўл олиши мумкин.

Dazn нашри маълумотларига кўра, 29 ёшли бразилиялик футболчининг вакиллари Мадриднинг «Атлетико» клуби билан фаол музокара олиб бормоқда.

 «Матрасчилар» ҳужум чизиғини кучайтиришни режалаштирмоқда ва Жезус номзодини жиддий кўриб чиқмоқда. Шу билан бирга, «Арсенал» ҳам футболчини сотишга қарши эмас. 

Англия чемпиони клуб бразилиялик ҳужумчи учун тахминан 20 миллион евро ишлаб олишни кутаяпти. Аввалроқ оммавий ахборот воситаларида Габриэль Жезусни қўлга киритишда асосий даъвогар сифатида «Наполи» тилга олинган эди.

Эслатиб ўтамиз, ўтган мавсумда Габриэль Жезус «Арсенал» таркибида Англия чемпионатида 14 та ўйин ўтказиб, учта гол муаллифи бўлди.