«Арсенал»нинг 100 миллион евролик трансфери амалга ошмади
«Ювентус» Кенан Йилдизни сотишни истамагани ва унинг жароҳати сабаб «Арсенал» ёзда уни трансфер қила олмайди.
Лондоннинг «Арсенал» жамоаси ёзги трансфер ойнаси ёпилгунча туринлик «Ювентус»нинг вингери Кенан Йилдизни сотиб олиш имкониятига эга эмас, деб хабар бермоқда Sports.kz.
Италия оммавий ахборот воситаларида аввалроқ 21 ёшли футболчининг 100 миллион евро атрофидаги суммага кўчиб ўтиши муҳокама қилинган эди. Хабарларга кўра, «канонирлар» бош мураббийи Микель Артета Туркия терма жамоаси аъзосини жамоага қўшиб олишга алоҳида қизиқиш билдирган. Бироқ футбол бозори бўйича инсайдер Фабрицио Романо таъкидлашича, «Ювентус» позицияси бу борада умуман ўзгармаган.
«Арсенал» доим Йилдизни юқори баҳолаб келган. Лекин клуб «Ювентус» футболчини сотиш нияти йўқлигини яхши биларди. Бу мавзу май ойидан бери ёпилган — ҳеч қандай имконият йўқ, — деган Романо.
Трансферга яна бир жиддий тўсиқ сифатида Йилдизнинг оғир жароҳати қайд этилмоқда. У янги мавсумда «Ювентус»нинг илк учрашувида оёғидан жиддий шикаст олди. Вингер маълум муддат майдонга туша олмайди, деган тахминлар бор. Энди Йилдиз жароҳат олган, шунинг учун бу вариантни унутиш мумкин, — дея қўшимча қилган инсайдер.
«Арсенал» эса ҳужумнинг чап қанотини кучайтириш бўйича изланишларни давом эттирмоқда. Бу, жумладан, Габриэл Мартинеллини Саудия Арабистонининг «Ал-Ҳилол» клубига сотиш эҳтимоли билан ҳам боғланмоқда. Номзодлар орасида «Эвертон» футболчиси Илиман Ндияй, «Атлетик» вингери Нико Уильямс ва «ПСЖ» ярим ҳимоячиси Брэдли Барколя тилга олинган.
Изоҳлар (0)