Асрор Алиқулов "Бухоро" устидан қозонилган ғалабадан сўнг: "Кучайишимиз шарт, селекциядан кўнглим тўлгани йўқ"

Суперлиганинг 8-тури “Машъал” учун омадли кечди. Боиси, муборакликлар “Бухоро” мезбонлигидаги ўйинда 1:2 ҳисобида муҳим ғалабани қўлга киритди. Ғалаба голи эса 90-дақиқада киритилди. Натижада “Машъал” учинчи ғалабасига эришди. Учрашувдан сўнг жамоа бош мураббийи Асрор Алиқулов бир қатор саволларга жавоб берди.

- “Бухоро” ҳимояга урғу бериб, қарши ҳужумларга ва стандартга эътибор қаратади. Биз шунга тайёргарлик кўргандик. Шу вақтгача ўйнаган ўйинларида шундай услубда, стандарт ҳолатларда хавф туғдирган. Биринчи бўлимда кўп хатоларга йўл қўйдик, тўпни назорат қилишга ҳаракат қилдик. Иккинчи бўлимда “Бухоро” ўйинчиларида чарчоқ сезилди ва бўш зоналар пайдо бўлди. Ҳужумларимизни сони ошди, вазиятлар ярата бошладик. Ғалабага ҳисса қўшган футболчиларни ва уларни тайёрлашга ҳисса қўшган ҳар бир инсонларни табриклайман. Узоқ йўл босиб келган мухлисларимизга ҳам раҳмат. Ғалабани уларга бағишлаймиз.

- Биринчи бўлимда хаддан ташқари зерикарли футбол кўрдик. Бунга сабаб нима? Тактика шунақа бўлганми? Нафақат “Машъал”, балки “Бухоро”да ҳам шундай. Пассив футбол бўлди. Иккинчи бўлимда ўйин очилиб кетди.

- Бундай пассив футбол кўрсатмоқчи эмасдик. Биринчи навбатда “Бухоро” ҳимояга урғу берди. Биз тўп билан секин ишладик. Ҳужумга қўшилишда ҳимоячиларимизда ўзларига ишонч йўқ эди. Кўп хатоликка йўл қўйишди. Кеча йўл босиб келдик ва йўлни чарчоғи ҳам сезилди. Иккинчи бўлимда ҳаво салқинлиги ва ҳаракатланиб анча енгиллашганди. Шу боис танаффусдан кейин ўйинга тезкорлик қўша олдик. Захирадан Ислом Баратов майдонга тушиб, ўйинга яхши қўшилди. Иккинчи бўлимда “Бухоро” яна тактикасини ўзгартирмади. Қарши ҳужумда ўйнади. Бўшлиқ зоналар бўлганидан кейин биз яхшироқ кўриндик ва фаолроқ ўйнашга ҳаракат қилдик. Қийин ўтган учрашувда ғалаба қозондик.

- Бугун дарвозабон Умид Ҳамроев ўйнади. Олдинги ўйинларда бошқасига ишонч билдирилганди. Дарвозабонни танлашда қандай мезонларга амал қиласиз? Ёки хато қилиши билан алмаштирасизми?

- Машғулот жараёни. Умид бир нечта учрашувдан бери асосий таркибдан жой олиб яхши ўйин кўрсатяпти. Чемпионат бошида Достон Тўхтабоевга имконият бердик. Яхши ўйинлари ҳам бўлди. Қаердадир сусткашликка йўл қўйди. Иккаласи ҳам асосий дарвозабонимиз. Ўйинга яқин ва ўйин услубимиздан келиб чиқиб, дарвозабонлар мураббийи билан маслаҳатлашган ҳолатда учрашувга туширамиз.

- Жамоа гоҳида ишончли ўйнаяпти ва мана шундай ҳолатда “Сўғдиёна”ни мағлуб этди. Гоҳида ишончсиз ўйнаяпти. Мавсумлар оралиғида таркиб сезиларли даражада кучайиши мумкинми? Ё таркиб ўзаги сақланган ҳолатда чемпионат охиригача етиб боришни ўйлаяпсизми?

- Кучайишимиз шарт. Чунки селекциядан кўнглимиз тўлгани йўқ. Айтиш мумкинки, янги футболчини қаердан оламиз? Масалан, бугун иккинчи бўлимдаги ўйинни биринчи бўлимда ҳам кўрсатса бўладику. Футболчиларга ўзига ишонч етишмаяпти. Кўплари про лигада дебют қилишган. Айримлари Суперлиганинг бошқа клубларида ўйин амалиётисиз қолиб кетишган.

-  Жисмоний ҳолатда камчиликлар кўзга ташланяпти. Мавсум боши бўлганида тушунишимиз мумкин эди, аммо ҳозир ўртаси. Нега ҳали ҳам шу муаммо мавжуд?

- Жисмоний ҳолат деганда сиз нимани тушунасиз? Югуриш ёки...

- Фақат югуриш назарда тутилмайди...

- Умумий жисмоний ҳолатда ютқаздик, дея олмайман. Ҳаракат бор эди. Фақат тезликда ютқаздик. Буни тан оламан. “Бухоро” футболчилари тезкорроқ. Курашларда улар кўпроқ ғалаба қозонишяпти. Аммо бу футболчиларни умумий жисмоний тайёргарлигидан эмас. Кўпроқ ўйинчиларни индивидуал имкониятлари. Ўйинчиларимиз 90 дақиқа ўйнашди. Қандайдир ўйин чўзишлар бўлмади. Атлетизм бўйича “Бухоро” биздан устун, буни тан оламан.